New Delhi, ïaïong:
Hadien ba ka lympung Women’s Premier League ka la long kaba jop bad seisoh ia kaba la pynlong nyngkong eh bad plie pyrda mynta u snem, kumta na ka liang u nongpyn-iaid ba ha khlieh duh jong ka lympung Indian Premier League u Arun Dhumal u iathuh ba ma u lem bad ka kynhun kitkam baroh kawei ka don ia ka jingthmu mynta na ka bynta ban wanrah noh sa ia ka rukom pynialehkai ia katei ka lympung ialehkai ki kynthei da ki jingpyniakhun ha-iing bad shabar ruh kumjuh naduh ka aiom ialehkai ba ar. Pynban ha kaba ia dei bad ka jingdon jong ki kynhun ialehkai kin iaisah hi kumjuh, kata 5 kynhun na ka bynta ki lai snem ki ban dang wan.
Ka aiom ialehkai ba nyng-kong jong ka WPL ka wanrah ia u soh uba bang bad ba thiang hapdeng ki paidbah bad ki nongialehkai ruh kumjuh, hynrei naba ia ka lympung lah pynlong hapoh ka jingkhim palat jong ka por bad kata hadien ka Women’s T20 World Cup, na ka liang jong ka BCCI ka lah shim ia ka rai na ka bynta ban pynlong ia baroh ki jing-ialehkai ha baroh shi lynter jong ki ar tylli ki madan ialehkai kiba heh tam ha Mumbai.
Ka jingpynkhreh mynta ha ka ban pynlong ia ki jingialehkai ha-iing bad Shabar ruh kumjuh kan long ka jingiakhun kaba tyngeh na ka bynta ki nongpyniaid ka lympung bad kumjuh ruh ka jingiarap kaba khraw ia ki kynhun ha ka ban nang iai wanrah shuh shuh ia ka jingiadei kaba jan bad ki paidbah bad na ka liang jong ka synjuk ka kwah ruh ban shimnoh ia kata ka sienjam ha ka por kaba kloi-lan kata naduh ka aiom ialehkai ka ban wan.
Ha ka lympung ialehkai ba dang shu dep, ki paidbah ki lah iabun ha ka ban sakhi ia ki jingialehkai ha Brabourne bad ha D.Y. Patil Stadium bad kaba pynshongshit ia ki nongpeitkai kumjuh ruh ia ki nongialehkai ha ryngkat bad ki hok jong ki kynhun ialehkai ki pynlong ia ka BCCI ban nangjan shuh shuh ha ka ban khur sha ka ?4,700 klur bad ka hok pynbna paidbah lyngba ki lad pathai kaba da ?951 klur.
Kawei na ki daw ia ka jingbym shym la lah haduh mynta ban pynlong ia katei ka lympung ialehkai ban don haduh 6 tylli ki kynhun ialehkai, ka lah ban dei ruh na ka daw jong ka jingiai duna palat ha kaba iadei bad ka jinglong-jingman jong ka sap ialehkai ba ki nong-ialehkai na ki shnong bapher bapher ki don.
Hynrei ka long ruh kaba donkam shibun na ka bynta ban ai sha ki nongialehkai na ki synjuk bapher bapher jong ka ri ia ka lad ka lynti ha ki na ka bynta ka jingiadonbyntalang ka jong ki ha ka WPL. Ka khubor ka iathuh ruh ba kita ki san kynhun ialehkai ki lah ruh ban jied haduh san ngut ki nongialehkai kiba na sha shiliang-duriaw ha ka kynhun iakhun 1st XI hynrei ka nongialehkai kaba san na ki kynhun bapher bapher ka dei ban long kaba na Associate Nation.
