Shillong, Ïaïong 05:
U rangïalehkai kriket ka ri u Shubman Gill u la jam sha ka kyrdan basaw napdeng ki nongtied kat kum ka jingpyllait da ka ICC ïa ka thup ki rangïalehkai ha ka ODI ha ka sngi Balang.
Nalor u Gill, u Virat Kohli bad u Rohit Sharma ruh ki la don lang hapoh ka thup kaba shiphew.
U Kohli u la jam sha ka kyrdan ba hynñiew bad u Rohit u la ïai sah ha ka kyrdan ba phra bad ïa ka kyrdan kaba nyngkong la lamkhmat da u kapten ka Pakistan u Babar Azam.
U Mohammed Siraj u la ïai bteng ban long kum nongkawang bol jong ka ri na ka bynta ban don ha ka thup kaba shiphew ha kaba u la don ha ka kyrdan balai, kata hadien ïa u rangïalehkai na Australia u Josh Hazlewood bad u Trent Boult na New Zealand.
U rangïalehkai ka South Africa u Aiden Markram u la jam haduh 13 kyrdan na ka bynta ban kynjoh sha kaba 41 napdeng ki nongtied bad u la jam haduh 16 kyrdan kata sha kaba 32 napdeng ki nongïalehkai kiba don ha ka thup jong ki all-rounders hadien ba u la lah ban pynurlong ïa ka South Africa ban pynliem ïa ka Netherlands da 2-0 ha ki lai sien ïakhun jong ka series ha Johannesburg.
Uwei pat u rangïalehkai ka New Zealand u Henry Nicholls, uba la jam ar kyrdan kata sha kaba 69 ha ka kyrdan jong ki nongtied bad u paralok ba ïalehkai lang u Will Young, uba la jam 60 kyrdan kata sha kaba 143 hadien ba u la lah ban pynurlong ïa ka kynhun ban jop da 2-0 pyrshah ïa ka Sri Lanka.
U Matt Henry uba la lah ban ïalehkai bha na ka bynta ka New Zealand, u la jam san kyrdan na ka bynta ban bat ïa ka kyrdan ba hynriew ha ka liang ki nongkawang bol, katba u rangïalehkai ka South Africa u Sisanda Magala u la pynbna ïalade ba u la jam 35 kyrdan kata sha kaba 165 hadien ba ula lah ban khur 8 wiket na ki ar sien ïakhun, kynthup ïa ki san wiket ha ka jingïakhun pyrshah ïa ka Netherlands.
Haba phai sha ka kyrdan ki nongïalehkai jong ka T20I, u Suryakumar Yadav u la ïai bat ïa ka kyrdan ba hakhlieh napdeng ki nongtied, katba u Hardik Pandya u la ïai bat ia ka kyrdan ba-ar ha ka thup jong ki nongïalehkai all-rounders.
U rangïalehkai ka Bangladesh u Litton Das u la jam 21 kyrdan, kaba long ka kyrdan kaba heh duh. U rangïalehkai ka New Zealand u Daryl Mitchell u la jam san kyrdan na kaba 26.
