Nongpoh, Ïaïong 05:
Ki pulit ka Anti Narcotic Task Force (ANTF) na Ri Bhoi District, ha ka Sngi Balang ki la ïoh ban kurup ïa u drok ba la suba jur u ‘Heroin’ bad kem ruh ïa uwei u briew ba donkti.
Kane ka jingïoh kurup drok bad kem ïa utei u briew ka la long hadien ba ki pulit ka ANTF ki la ïoh ka jingtip ba tikna halor ka jingdon ki briew kiba thmu ban pynpoi ïa u drok sha ka nongbah Shillong na Guwahati. Kumta ki pulit ki la pynlong ka jingpynap shrip ban ïoh kem ïa kiba donkti halor kane ka kam beaiñ.
Katkum ka jingtip ba la ïoh na ki pulit, la ïathuh ba dei ha ka por kumba 1 baje eiei mynsngi ba ki pulit ki la ïoh ban bat noh ïa kawei ka kali kamai Sumo kaba don ïa u number ML10-A-2089 na Shangbangla kaba dang hap hapoh ka jingpeit jong ka thanatNongpoh.
Haba pynlong ka jingtalasi ïa kane ka kali, ki pulit ki la ïoh ban kurup ïa kumba 20 tylli ki jingsong sabon kiba la thep bha ïa u drok uba don ïa ka jingkhia kaba 191.02 gram. Hadien ba la leh ïa ki test ban pynshisha, la lap ba utei u drok ba la ïoh kurup u dei u ‘Heroin’.
Nangta haba ïadei bad kane ka jingjia, ki pulit ki la kem noh ïa uwei u briew ba la tip kyrteng kum u Dipankar Ghosh, 35 snem ka rta, na ka shnong Upper Jail Road, Shillong. Kumta la pynngat ïa u ha ki kyndon aiñ jong ka Narcotic Drugs and Psychotropic Substances (NDPS) bad ka jingtohkit halor kane ka jingjia ka dang ïaid shakhmat.
