Madrid, ïaïong:
Katkum ka khubor ba lah pyllait paidbah da kawei na ki khlur ialehkai Tennis ka ri Spain ka Garbiñe Muguruza ka long ba katei ka nong-ialehkai ka pyntip mynta ban ym shim bynta ha ki ar lympung ialehkai Grand Slam jong une u snem ba mynta ki ban sa long, kita ka French Open bad Wimbledon.
Nangta ka khubor ka iathuh ruh ba katei ka nongialehkai kaba lah khur teng kum ka lahduh ha ka pyrthei kam shym la ialehkai shuh ha ki lympung ba long na shabar naduh ka 30 tarik u K’lyngkot mynta u snem bad mynta u snem ka don ia ki 0-4 dor-thong jingjop ha ka.
Ka jingbym shym la kwah jong ka ban shimbynta ha kitei ki ar lympung ialehkai ki ban wan ka long na ka daw jong ka jingiaid don ka jong mynta ha ka shuti bad ka jingpynlut ruh ia ki por ki sngi jong ka bad la ki jong kiba haiing bad ki paralok ruh kumjuh.
Katei ka nongialehkai ka long ka nongialehkai kaba lah pawnam bha ha ki snem ba mynshuwa ha kaba ka lah rah ruh ia ka ri baroh kawei sha ka nam bad ka burom hadien ba ka lah khur ia ka nam kum ka lahduh ha ka French Open 2016 da kaba pynliem noh ia ka Serena Williams ha ka jingiakhun phainal bad kumjuh ruh kum ka lahduh Wimbledon ha u snem 2017 hadien ba ka lah khur jingjop ha ka phainal pyrshah ia ka Venus Williams. Hynrei ha shuwa bad hadien jong kitei ki snem, ka Muguruza ka lah wan ruh ha ka kyrdan ba-ar ha ka lympung ialehkai Wimbledon ha u snem 2015 bad kumjuh ruh sa ha ka Australian Open 2020.
