Jowai, Ïaïong 07:
Ka Khasi Students’ Union, Namdong Area Unit ka la byrngem ban khang tala ïa ka Namdong CHC hadien ba lap ïa ka jingdkoh treikam jong kane ka jaka sumar kaba dang shu dep kyntiew kyrdan ha kine ki khyndiat bnai na ka PHC sha ka CHC ha u Naiwieng 2022.
Ka seng ka la wan ïakynduh ruh ïa u District Medical Health Officer (DMHO), West Jaiñtia Hills District, u Dr. K.C. Ajar ha ka 6 tarik Ïaïong halor ka jingdkoh treikam kane ka CHC.
Ka KSU ka la ïathuh ba na ka daw ka jingbym biang ka um ha kane ka jaka sumar, kane ka CHC kam pdiang ban sumar ïa ki paid nongpang na kylleng ki shnong kiba hap hapoh ka CHC Namdong.
U General Secretary, KSU Namdong u la ong ba ki la ai da ka jingthoh ha u DMHO bad la pynpaw ba nalor bym pdiang ïa ki nongpang ha kane ka CHC, ki paidbah ba wan shim dawai ha kane ka jaka sumar ruh ki shem jingeh namar ka jingbym biang por ka rukom wan trei ki nongtrei kane ka jaka sumar.
Na ka liang u DMHO u la kular ban shimkhia ban pynbiang ïa ki jingdonkam ha katei ka jaka sumar. Katba na ka liang ka KSU ka la ai por hapoh shi taïew ban pynbiang ïa ki jingdonkam ha kane ka jaka sumar bad lada ka tnad ka koit ka khiah ka pulom, ka seng ka la rai ban khang tala shi syndon ïa kane ka jaka sumar.
