Shillong, Ïaïong 07:
“Hapdeng ki jingkren halor ka aiñ ha kaba ïadei bad kane ka mukotduma hadien ka jingshah rai pynrem, ka don ruh ka khana halor ka khynnah kaba la jah lynti bad ba ka jingim jong ka, ka la shah pynjot.”
Kine ki long ki kyntien ba la pynpaw da ka Meghalaya High Court ha ka 5 tarik Ïaïong ha kaba ka la kyntait ïa ka jingmudui jong u MLA barim ka Mawhati, u Bah Julius Kitbok Dorphang, pyrshah ïa ka jingshah rai pynrem bad jingshah pynsaja ha ka ïingbishar ha Nongpoh halor ka jingdonkti jong u ban leh be-ijot ïa kawei ka khynnah kaba dang hapoh 16 snem ka rta.
U Bah Julius u la leit sha High Court hadien ba ka ïingbishar ha Nongpoh ha ka 13 tarik Nailar, 2021, ka la rai pynrem ïa u hapoh ka kyndon 376(2)(i) bad (n) jong ka Indian Penal Code, 1860, bad kyndon 5 jong ka Protection of Children from Sexual Offences (POCSO) Act, 2012.
Ha ka 24 tarik Nailar, 2021, ka ïingbishar ha Nongpoh ka la pynbna ba u Bah Julius un hap shong patok na ka bynta 25 snem bad un hap ban siew ruh ïa ka kuna kaba T. 15 lak, bad lada um lah ban siew, un hap ban shong patok sa san snem. Kane ka T. 15 lak ka long kum ka jingsiew bailutksan sha katei ka khynnah.
Nalor u Bah Julius, sa lai ngut kiwei pat, kita, ka Mamoni Parveen, ka Darisha Mary Kharbamon bad u Sandeep Biswas, ki la shah rai pynrem hapoh ki kyndon jong ka POCSO Act, 2012, Indian Penal Code, bad ka Immoral Traffic Prevention Act, 1986.
Lah ban kdew ba u Bah Julius ha u snem 2021 u la leit sha High Court hadien ba ka ïingbishar ha Nongpoh ha ka 13 tarik Nailar, 2021, ka la rai pynrem ïa u hapoh ka kyndon 376(2)(i) bad (n) jong ka Indian Penal Code, 1860, bad kyndon 5 jong ka Protection of Children from Sexual Offences (POCSO) Act, 2012.
Ha ka 24 tarik Nailar, 2021, ka ïingbishar ha Nongpoh ka la pynbna ba u Bah Julius un hap shong patok na ka bynta 25 snem bad un hap ban siew ruh ïa ka kuna kaba T. 15 lak, bad lada um lah ban siew, un hap ban shong patok sa san snem. Kane ka T. 15 lak ka long kum ka jingsiew bailutksan sha katei ka khynnah.
Nalor u Bah Julius, sa lai ngut kiwei pat, kata, ka Mamoni Parveen, ka Darisha Mary Kharbamon bad u Sandeep Biswas, ki la shah rai pynrem hapoh ki kyndon jong ka POCSO Act, 2012, Indian Penal Code, bad ka Immoral Traffic Prevention Act, 1986.
Haba pynbna ïa ka rai bad hukum kaba don 41 sla, ka High Court ka la ong ruh, “Ka imlang-sahlang baroh kawei ka dei ban pan map na kane ka khynnah namar kam shym la lah ban leh eiei na ka bynta jong ka.”
Na ka liang ka High Court, ha ka por ba ka la shong bishar halor katei ka mukotduma jong u Bah Julius, ka la kylli pyrthew shaphang ka jinglong jingmang jong katei ka khynnah. Ka paw ba haduh mynta ka dang don hapdeng ka jingpeit jong ka sorkar bad ïa ki jinglut jingsep ba man la ka sngi la bei da ka sorkar.
Ka High Court ka la bthah ba ka sorkar jylla ka dei ban peit ïa ka bha ka miat jong kane ka khynnah tad haduh ba kan da kynjoh sha ka 25 snem ka rta. Ka la ong ruh ba ka jingsiew bailutksan sha kane ka khynnah kam dei ban duna ïa ka T. 20 lak. Nalor ka T. 15 lak kaba dei ka kuna ba u Bah Julius un hap ban siew sha ka, ka sorkar kan hap ban ai sa T. 5 lak sha kane ka khynnah.
Nalorkata, ka la ong ba lada u Bah Julius um siew ïa ka kuna kaba T. 15 lak, un hap ban shong patok sa san snem, bad na ka liang ka sorkar pat kan hap ban ai ïa kane ka T. 15 lak sha katei ka khynnah.
Ïa ka pisa kaba T. 20 lak yn hap ban thep ha ka kyrteng jong katei ka khynnah hapoh lai bnai hadien ba ka sorkar ka la shim ïa ki lad ki lynti ban pyntikna ba kane ka pisa baroh ka dei ban leit sha katei ka khynnah khlem da pynlut shawei lane khlem da shukor ïa kane ka khynnah.
Shuh shuh ka High Court ka la hukum ba ka sorkar kan hap ban shim jingkitkhlieh halor ka jingsumar ïa katei ka khynnah khlem da donkam ban siew eiei bad ka jingsumar kaba ïahap bad u ophisar Grade II jong ka sorkar jylla na ka bynta 20 snem.
Nalorkata, ka High Court ka la ong ba lada don kino-kino ki prokram bakyrpang lane ki lad ai kam ai jam ba katei ka khynnah ka lah ban trei lane lada don ka lad ban pynshong skul ïa ka, ka sorkar kan hap ban ai jingïarap ïa katei ka khynnah khnang ba kan lah ban im ka jingim kaba biang bad kaba dap da ka koit ka khiah.
