Shillong, Ïaïong 07:
U President ka Khasi Students’ Union (KSU) Barak Valley Circle kaba hap ha Assam u samla Walton Rymbai, u la ïathuh ba ka jingeh ba ki Khasi ki ïakynduh ha Barak Valley ka dei beit bad ka tnat Wildlife Sanctuary kaba ju wan pyndik ïa ki shnong Khasi, hynrei kin ïakhun beit namar ki la sah ha kane ka jaka la slem bha.
Ka jingïoh ban ïakren kyrpang bad une u nongïalam ka KSU Barak Valley Circle ka dei ha ka por ba ki wan ïashim bynta ha ka General Executive Council ka Khasi Students’ Union Seng Kmie kaba long ha ka 4 tarik Ïaïong 2023 ha ïingdorbar shnong Jaïaw Shyiap bad Lumpyllon.
U la ïathuh ba ki shnong Khasi ha Barak Valley ki don palat 375 tylli ki shnong bad ka jingdon briew ka poi palat 2 lak ngut.
“Naduh ba ka KSU ka la wan sha Barak Valley, ki samla pule Pnar kiba leit pule sha jaka sor, ki longkmie kiba leit ïew ruh ki la kham shngaiñ” u la ong.
Nalorkata, u samla Walton u la pyntip ruh ba ka KSU ka la pynrung dkhot 10 ngut shi shnong na ki 375 tylli ki shnong Khasi kiba sah ha Barak Valley. Nangta ka seng ka la pynrung dkhot palat 600 ngut ïa ki samla pule kiba pule sha ki jaka sor.
U la ong biang ba ka jingeh ki Pnar kiba sah ha Barak Valley ka dei namar lada wan ka tnat Wildlife Sanctuary jong ka Sorkar Assam ki sheptieng namar kin knieh ïa ka jaka jong ki Khasi kiba im da ka rep ka riang.
Halor ka shongkha shongman, u la ïathuh ruh ba ki shnong Khasi kiba don ha Barak Valley ki la buh kyndon ba kino-kino kiba ïoh lok da kiwei ki jaidbynriew ki hap mih beit napoh shnong khnang ban lait ka jingïashong khleh hapoh ka shnong.
Ha kane ka GEC ka KSU, ki shnat treikam (unit) kiba don ha ki jylla ka thaiñ Shatei Lam Mihngi ki la poi lut lait noh kiba don ha Delhi, Bangalore, Dehradun bad kiwei kim shym la poi namar ka jingjngai palat ka lynti.
Ki shnat treikam ka KSU kiba don shabar ka jylla kin wan biang sha Shillong ynda la buh tarik ban ïa jied ïa ki nongkitkam ba thymmai ka Central Executive Committee (CEC) ka ban sa long ha kine ki bnai ban wan.
