U Sumar Sing Sawian
ORGANIC FARMING, ka dei ka kyntien, kaba ia kren ialap bha ha kaba iadei bad ka rep ka riang, kaba ka pyrthei ka iabeh, kata ban pyndonkam da ka SBOH MARIANG. Hapoh kane ka Ri Hynñiewtrep, ki nongrep nongriang ki pyndonkam da kane ka sboh, ia kaba la ong ruh ka SBOH PYUT na ki sla dieng sla siej, ki ñiut ki ñier kiba la pyut. Hangne ha jylla Meghalaya, ka tnat sorkar ka rep ka riang bad ruh ki lad hikai bad tih jingtip halor ka rep ka riang, kum ka Indian Council of Agricultural Research (ICAR) kaba don ha Umiam Ri Bhoi, ki pynshlur ia kane ka rukom rep, khnang ban ioh ia ki jingthoh kiba tei ia ka koit ka khiah, ym da ka sboh dawai dukan, kaba long ka daw jong shibun ki jingpang jingjhia, bad kiba pynduh ia ka jingshlur bad jingsei soh jong ka khyndew.
PEAK HOUR ka dei ka kyntien Phareng kaba mut ka por ba dang khluid bad ieng rasong bha ha ki kam ki jam ka leit ka wan. Ha ka kyntien Khasi lah ban ong ba ka dei ka POR THNEM, kumba thnem ka ïew ka ïew ka hat.
POLICY ka dei ka kyntien Phareng, kaba kdew ia ka rukom bad pyrkhat treikam, khamtam ha ka synshar ka khadar. Barabor ju iohsngew ba ka sorkar kam don ka POLICY, ne ka lynti ba la pruid dak ban pyniaid bad pyntrei. Khnang ban don ka ioh ia kum kata ka policy ba dei ban bud lynti, ha ka kyntien Khasi, lah ban ong ka KPAI SAIN TREIKAM.
POLITICS ka dei ka kyntien, khamtam kaba iadei bad ki seng saiñ pyrthei kiba pher bapher, ia kaba ha ka kyntien Khasi, lah ban ong ka SAIN PYRTHEI, ba ka don ka jingialeh ne pynkhleh jaktung ia ka SAIN PYRTHEI.
POET, ki dei kiba thoh ia ki kynja phawar, kiba iahap sur ne tara bad ki kyntien kiba don bad Jylliew jingmut, kum ki nongthoh, kiba don na ki kiba la paw nam bad paw pyrthei, kum u Babu Soso Tham, Rabindranath Tagore bad kiwei kiwei.
Kum kine ki khraw pyrkhat ha ka dur jong kum kine ki jingthoh, ha ki kyntien Khasi, ngi ong ki MYLLUNG. Ia ki jingthoh jong ki, kata ki POEMS, ngi ong ki SUR MYLLUNG.
PRESSURE, ha ka kyntien Phareng ka mut kaba da ban ne shon khia, ia kaba ha ka kyntien Khasi ngi ong SHON KHIA. Kumta ki don bun ki kynhun ne ki seng kiba ban SHON KHIA. Khamtam ha ki ryndang kti ki don ki thied, kiba ki khot ki PULSE, ia kiba ki nongsumar pang ki ju twad. Ha ka kyntien Khasi, ki Pulse ki dei ki KYNDEH THIED.
Ha sawdong sawpud ka Mei Mariang, ki don bad mih ki syntiew kiba bun ki rong ki rup. Kawei na kita ki rong, ka dei kaba ha ka kyntien Phareng ki ong PINK. Ha ka kyntien Khasi ngi ong SAWLIA, ka rong kaba ju iohi khamtam ha ka por mih sngi bad ruh ha ka por sep sngi. Kane ka kyntien SAWLIA ka wan na ka kyrteng jong kawei ka shnong, kata ka NONGSAWLIA kaba don ha thaiñ Sohra. Namar ha kane ka shnong ha ka por step phyrngap bad noh ka sngi, ka don kata ka jingshat ba SAWLIA, bad kumta ka shnong ka la ioh ia ka kyrteng Nongsawlia.
Ka PHILOSOPHY ha ka kyntien Phareng ka dei ka thwei jong ka saiñ pyrthei pyrdaiñ halor kano kano ka jingstad ne ka jingngeit. Ha ka kyntien Khasi, lah ban ong ka KHAN PYRKHAT.
