Shillong, Ïaïong 07:
Wat la ka ilekshon MP Lok Sabha ka sah sa tang shisnem pura ba ki paidbah kin leit jied biang ha u snem 2024. Ki kyrtong kiba paw kyrteng na ka seng BJP ki don lai ngut ba ki kwah ban ïakhun ïa kane ka ilekshon na Shillong konstitwensi.
Napdeng ki lai ngut ki kyrteng kiba la mih ha kine ki sngi, ki kham bun ki nongkitkam bad ki kyrtong ka BJP kiba ïakhun ïa kane ka ilekshon MLA ba dang shu dep ki kham kwah ïa ka kyrteng u Bah HM Shangpliang ba un long u kyrtong ka BJP na Shillong.
Kine lai ngut kiba paw kyrteng ban ïakhun ïa kane ilekshon MP Lok Sabha ki long u Bah HM Shangpliang, MLA barim ka Mawsynram, u Bah Ernest Mawrie, President ka BJP Meghalaya, u Bah Mariahom Kharkrang kum kyrtong BJP na North Shillong.
Katkum ki khubor kiba la ïoh lum la ïathuh ba ha ka jingïakynduh u Rituraj Sinha kum u General Secretary ka BJP na Delhi ha ka 3 tarik Ïaïong 2023 ha shlem treikam ka seng ha Shillong ïa ki nongkitkam ka BJP Meghalaya, ki kyrtong kiba ïakhun ïa kane ka ilekshon MLA ba dang shu dep ki kham pynpaw ba ki kwah ïa u Bah HM Shangpliang ba un long kum u kyrtong ka seng ha ka ilekshon MP Lok Sabha ban long ha u 2024.
Ki khubor ki ïathuh ka jingkwah ïa u Bah Shangpliang ban ïoh ïa ka tiket BJP ka dei namar u la long ruh u MLA barim ka Mawsynram, uba la kren ïa ka jingeh jong ki nongrep ha ïingdorbar thawaiñ kaba ki nongrep haduh mynta ki pyrto hadien ba la lah ban pynkylla mar rep ïa u synsar, slatyrpad bad sohmrit.
Nalorkata, ki khubor ki ïathuh ruh ba ki kwah ïa u Bah Shangpliang namar u dei u IAS ba la shongthait ka sorkar jylla uba lah ruh ban kren ïa ka jingeh jong ka jaidbynriew bad ka jylla baroh kawei ha ïingdorbar parliament. Ha ka por ba u long kum u MLA u la ju kren ruh ïa ka jingeh jong ka jaidbynriew hapoh ïingdorbar thawaiñ ka jylla.
Kane ka jingïakren shaphang ka ilekshon MP ka dei hadien ba ka BJP ka la dep thew dep woh ïa ka jingshah rem ki kyrtong ha kane ka ilekshon MLA ba dang shu dep.
Wat la ka sur ka kham noh ïa ka kyrteng u Bah HM Shangpliang, hynrei ka BJP na Delhi bad Meghalaya kin dang bishar bniah ïano ban ai tiket namar ka por ka dang biang bha ba kin dang twad jingmut.
