Buenos Aires, Iaïong:
Hadien katto katne bnai ba ka kynhun ialehkai phutbol ka Argentina ka lah ioh ban rah shalade ia ka trophy jingjop na ka lympung ialehkai World Cup 2022 kaba lah long ha Qatar bad kumjuh ruh ha ka jinglah ka jong ka ban khur ia ki jingjop ha ki katto katne ki jingialehkai hadien katei ka lympung, kumta ruh katei ka kynhun kaba bat mynta kum ka lahduh ha ka pyrthei ha ka thup kyrdan ba thymmai jong ka FIFA, ka la lah mynta ha ka ban pynhiar kyrdan noh ia ka kynhun ialehkai ka Brazil na ka bynta ban khur biang shalade ia ka kyrdan ba 1 ha ka pyrthei hadien hynriew snem kynthih ba katei ka kynhun kam shym la lah ban bat shuh ia katei ka kyrdan.
Shuh shuh ruh ka khubor ka iathuh ba ka jingialehkai paralok kaba dangshen ka jong ka, ha kaba ka lah rah ia ka thong jingjop pyrshah ia ka Panama da 2-0 kol bad ia ka Curacao da 7-0 kol, ki lah iarap shibun ia ka tei ka kynhun ialehkai ban kamai ia ki 1840.93 dor-thong da kaba pynhiar noh ia ka Brazil na ka khet ha katei ka thup kyrdan hadien ba ka kynhun ka don ia ki 1834.21 dor-thong bad kaba lah ioh ruh ia katei ka bainong na ka jingshah rem noh ka jong ka na ka jingialehkai paralok bad ka Morocco da 2-1 kol bad kaba lah shah pynhiar mynta sha ka kyrdan ba 3.
Ym tang ba ka Brazil ba kan shah pynliem noh ha katei ka kynhun na ka kyrdan ba nyngkong ba ka bat baroh shi katta, hynrei lah shem ruh ba ka kynhun ialehkai na France ka lah jam shakhmat ia ka da kaba shong mynta ha ka kyrdan ba 2 hadien ba katei ka kynhun ka lah iai khur biang sa shisien ia ki jingjop jong ka ha ka jingiaknieh rung sha ka UEFA Euro 2024 pyrshah ia ka Netherlands da 4-0 bad kumjuh ruh sa ia ka Republic of Ireland da 1-0 kol.
Shuh shuh ruh Shabar jong kitei ki lai kynhun ialehkai kiba lah wan sha ki kyrdan ba shakhmat, kam shym la don shuh kano kano ka jingjam shakhmat napdeng ka thup ba 10. Kumta ha ka tei ka thup ba thymmai mynta, ka Belgium da 1792.53 dor-thong ka shong mynta ha ka kyrdan ba 4 lem bad ka England da 1792.43 dor-thong ha ka kyrdan ba 5 ia kaba lah bud pat nadien da ka Netherlands ha ka kyrdan ba 6, ka Croatia ha kaba 7, ka Italy ba 8, ka Portugal ba 9 bad ka Spain ha ka kyrdan ba 10 kaba lah pyndep ruh ia katei ka thup kyrdan ba 10 ha katei ka thup ba thymmai mynta.
Ka lah don ruh ka jingiakylliang jaka da ka Senegal ha ka jaka ba 18 bad ka Denmark ha kaba 19 kiba long tang kitei ki kynhun ialehkai kiba lah wanrah ia ka jingkylla ha ka thup ba 20. Ka kynhun kaba lah kham janai shuh shuh ha kane ka bynta ba mynta jong ka thup ka long ka Central African Republic da kaba kiew haduh shiphew jaka na ka bynta ban shah pynshong ha ka jaka ba 122 da 10 jaka ha ka thup kyrdan ha ka pyrthei.
