Shillong, Ïaïong 07:
Ka Meghalaya High Court ha ka 5 tarik Ïaïong ka la pynksan ïa ka jingshah pynrem jong u MLA barim ka Mawhati, u Bah Julius Kitbok Dorphang, ha kawei ka ïingbishar ha Nongpoh ha u snem 2021 halor ka jingleh be-ijot ïa kawei ka khynnah kaba dang hapoh 16 snem ka rta, bad ka la kyntait ïa ka mukotduma jong une u Chairman barim ka seng Hynñiewtrep National Liberation Council (HNLC).
U Bah Julius u la leit sha High Court hadien ba ka ïingbishar ha Nongpoh ha ka 13 tarik Nailar, 2021, ka la rai pynrem ïa u hapoh ka kyndon 376(2)(i) bad (n) jong ka Indian Penal Code, 1860, bad kyndon 5 jong ka Protection of Children from Sexual Offences (POCSO) Act, 2012.
Ha ka 24 tarik Nailar, 2021, ka ïingbishar ha Nongpoh ka la pynbna ba u Bah Julius un hap shong patok na ka bynta 25 snem bad un hap ban siew ruh ïa ka kuna kaba T. 15 lak, bad lada um lah ban siew, un hap ban shong patok sa san snem. Kane ka T. 15 lak ka long kum ka jingsiew bailutksan sha katei ka khynnah.
Nalor u Bah Julius, sa lai ngut kiwei pat, kita, ka Mamoni Parveen, ka Darisha Mary Kharbamon bad u Sandeep Biswas, ki la shah rai pynrem hapoh ki kyndon jong ka POCSO Act, 2012, Indian Penal Code, bad ka Immoral Traffic Prevention Act, 1986.
Lah ban kdew ba ki la don artylli ki jingujor (FIR) pyrshah ïa u Bah Julius – kawei ha thanat Madanrting bad kawei ka thanat Nongpoh.
Ka High Court, ha ka hukum kaba don 41 sla, ka la ong ba ka long kaba shisha ba ka ïingbishar ka la peit ïa ki katto katne ki bynta jong ka jingtohkit ha kaba ïadei bad ka jingujor banyngkong ba la ai ha thanat Madanrting, hynrei ka paw shai ruh ba ka jingshah pynrem jong u Bah Julius ka dei halor ka jingjia ha Umïam Lake Resort ha Ri-Bhoi.
“Kaei kaba ka khynnah ka la batai halor ka jingjia ha kawei ka ‘guesthouse’ ha Motinagar, Shillong, ka ïingbishar ha Nongpoh ka khlem shim, hynrei ka la rai pynrem ïa u nongmudui (Bah Julius) halor kaei kaba la jia ha Umïam,” la ong ka High Court.
