Shillong, Ïaïong 07:
Ka KSU-Laban Circle ha ka Sngi Palei ka la kynnoh ba ki dkhot jong ka Vishva Hindu Parishad (VHP) ha ka jingïaid paidbah ba dang shen hapoh nongbah ki la pyrta ba kin pynkylla ïa ka Meghalaya sha ka ‘Hindu State’.
Haba kren sha ki lad pathai khubor hadien ka jingïakynduh bad u Deputy Commissioner ka East Khasi Hills, u President ka KSU-Laban Circle, samla Reuben Najiar u la ong ba ki briew kiba ïaid lynti ki la ïohsngew ba kito kiba ïashim bynta ha katei ka jingïaid paidbah ki la ong ba ka jingkulmar kaba la jia ha Gujarat ha ki snem ba la dep, kan sa wan jia ha Meghalaya.
U la ong ruh ba katei ka jingïaid paidbah kaba la pynlong da ka VHP ha ka 2 tarik mynta u bnai ka la pynbitar ïa ka seng bad ïa ka jaidbynriew baroh kawei.
Haba kdew ba katei ka jingïaid paidbah ka la pynthut ïa ka jinglong-jingman ka shong suk shong shngaiñ ha ka imlang-sahlang lyngba ki ‘video’ kiba la saphriang ha ki rynsan lad pathai, u la ong, “Kane ka jingïaid paidbah kam long kaei-kaei, hynrei tang ka jingpyni bor.”
“Kum ka seng ngi burom ïa baroh ki jait niam, hynrei ha kajuh ka por ngi dawa ba ki dei ban burom markylliang,” u la ong.
U samla Najiar u la ong ruh ba ha ka por ba katei ka jingïaid paidbah ka la poi ha ki bynta jong ka Red Cross, Laban sha Laban Ïew Dak, katei ka kynhun, ka la leit ban sangeh habar ka Ïingmane Presbyterian, Laban ha ka por kumba 1 baje mynsngi bad hangtei ki la sdang ban ïa hylla ‘Jai Sree Ram’ bad kiwei-kiwei kumba 10 minit, ha kawei ka liang kaba la pynthut shi kat dei ïa ka jingïaseng kaba dang long ha katei ka por.
“Kane ka long ka dak ban pynshit ïa ki Khristan jong ka Jylla bad ban wanrah ha ki ïa ka jingtieng haba ïadei bad kiwei pat ki jait niam (ha kane ka bynta, ki Hindu),” u la ong.
U President haba pynkynmaw ba ki Khristan kin sa rakhe ïa ka ‘Good Friday’ bad ‘Easter Sunday’ ha ka 7 bad 9 tarik mynta u bnai, u la ong, “Ngi kyrpad ïa ki bor distrik ba kiba kum kine ki jingïaid paidbah kim dei ban ïai jia ha kine ki sngi ki ban ïatyngkhuh bad ki Khristan jong ka Jylla.”
Ha kawei ka liang, ha ka jingthoh ba la aiti sha u DC, u la pynpaw ka jinglyngngoh ba ki pulit ka thanat Laban Police kiba la don ha katei ka sngi ki la long tang ki nongpeit kai bad kim shym la leh eiei ban phah ïaid shakhmat ïa kitei ki nongïaid paidbah ban lait na ka jingpynthut ïa ka jingïaseng.
“Ngi pynrem ïa ka jingbym lah jong ka thanat Laban ban tehlakam ïa kine ki nongbuaid niam haduh ba kin da pynthut ïa ka niam jong kiwei. Kum kine, ka seng kam lah ban shim sting bad ha kane ka sngi ngi la ïakren ruh bad u DC ba dei ban pynshitom ïa ki nongïalam ka VHP namar ka jingleh jong ki ka long shaba palat,” u la ong.
Hadien ba la pynthut ïa ka jingïaseng jong ka Laban Presbyterian, u la ong ba katei ka kynhun ki nongïaid paidbah ka la ïaid sa sha St. John Parish ban leh kumjuh, hynrei namar ka jingtuklar jong katto-katne ki nongshong shnong kiba la pynbor ïa ki pulit ban leh eiei, la lah ban pynsangeh noh ïa ki ban rung sha St. John Parish ha Madan Laban.
Shuh shuh u President u la bynrap ba wat la ïa ka ‘Ram Navami’ la rakhe ha ka 30 tarik Lber, 2023 ha baroh kawei ka India, balei pat ban rakhe ha ka 2 tarik u Ïaïong, 2023 kaba dei ruh ka Sngi U Blei Slatlai.
Ka seng ka la aiti ruh ïa ka jingthoh sha u DC halor katei ka bynta.
