Shillong, Ïaïong 07:
Ki paid riewngeit Khristan ha satlak ka pyrthei ki la rakhe kynmaw burom ïa ka sngi Thohdieng Bakhuid lane ‘Good Friday’ kum ka jingkynmaw ïa ka sngi ba shah shitom U Jisu bad ka jingshah ïap halor ka Diengphna.
Ki paid riewngeit Katholik ki la ïashimbynta ha ka jinglehburom ïa ka Diengphna Bakhuid ha kane ka sngi ba kynmaw ïa ka jingshah shitom u Jisu bad ha ka por janmiet la pynkut da ka jingïashimbynta ha ka jingïaid Lynti Diengphna. Kane ka long kum shi bynta ban kynmaw ïa ka jingïaid lynti u Jisu haba u bah ïa ka Diengphna bad ka jingkyllon jong u lai sien ha lynti.
U Archbishop ka Jylla niam bah Shillong, u Rev Victor Lyngdoh u la ïashimbynta ha ka jingleh burom ïa ka Diengphna Bakhuid ha Mawlai Parish ha ryngkat ki phew hajar ngut ki paid riewngeit ha ryngkat ka duwai ka phirat na ka bynta ka jingsuk ha ka Jylla bad ha ka pyrthei hi baroh kawei. Ka Balang Katholik ka duwai kyrpang ruh na ka bynta ki briew kiba duk kiba kyrduh, kiba pang bad kiba shem lanot khnang ba U Blei un aibor bad leh ki kambah na ka bynta jong ki nalor ka jingduwai na ka bynta ki nongsharai Balang kynthup ïa u Pope Francis bad kiwei kiwei.
Kiwei pat ki riewngeit Khristan ha kane ka sngi ki la pynlong jingïaseng ha la ki jong ki Ïingmane ban kynmaw ïa ka jingshah shitom U Jisu ha ki 2000 hajar snem mynshwa.
