Estoril, Iaïong:
U rangialehkai Tennis ka ri Norway u Casper Ruud u la lah ban ialehkai bha naduh kaba sdang jong ka jingiaid lynti ha ka Estoril Open hadien ba u lah ban khur ia ka jingjop ba nyngkong na katei lympung pyrshah ia u rangialehkai na Portugal u Joao Sousa da 4-6, 6-2, 6-2 ha ka jingiaknieh rung sha ka quarter-finals.
Kumta hadien katei ka jingjop jong u ha ka rynsan iakhun pre-quarterfinal, u Rudd un hap ban iakhun pyrshah sa bad u nongialehkai na Argentina Sebastian Baez; hadien ba utei u rangialehkai uba dang iai bat kum u lahduh ha katei ka lympung u la lah ban pynliem noh ia u Pedro Cachin da 6-4, 7-6(2). Shuh shuh ka khubor ka iathuh ruh ba u Ruud uba lah pynpaw ialade shakhmat ha ka tei ka lympung ialehkai ha ki snem ba lah leit noh, u lah rung sha ka jingialehkai ba mynta da 5-6 ki rekod aiom jingjop ki jong u hadien ba u lah shah pynliem noh ha ka kylla iakhun kaba lai ha ka Indian Wells bad Miami Open kiba dang shu dep long mynta u snem.
Kumta ruh utei u rangialehkai u lah pynthikna ba ha katei ka lympung ialehkai ba mynta un ym mad shuh shuh ia ka jingshah pynkut noh ka jingiaid lynti ha ka por kaba kloi ha u Sousa, da kaba pynkiew shuh shuh ia ka rukom ialehkai ka jong u baroh kawei ka jingiakhun kaba lah neh da ar kynta 15 minit na ka bynta ban pynjanai shuh shuh ia ka jingjop sha ka 4-0 ha ki lympung ialehkai ATP kiba u shimbynta. U long ruh u rangialehkai uba lah jam sha ka phainal ha ka French Open ha u snem ba lah dep. Ka long ruh ka sien kaba nyngkong ba u Rudd un rung sha ka quarter-final ha ka jingleit ialehkai jong u Shabar naduh bnai Nailur ha ka por ba u lah jam sha katei ka rynsan ha ka lympung ialehkai ha Seoul.
U Baez u don ia ka jingkhmih lynti na ka bynta ban khur ia ka trophy jingjop kaba nyngkong ha ka jingleit ialehkai ka jong u. kumta hadien ka jingpynliem noh ia u Radu Albot ha ka kylla iakhun kaba nyngkong, u la lah ruh ban pynkhein noh ia ki dor-thong sam bol jong u Cachin haduh san sien na ka bynta ban nang iai jam shakhmat hadien ka ar kynta 11 minit ialehkai. Ha kawei pat ka jingialehkai, u Marco Cecchinato u lah pynliem noh ia u Fabio Fognini da 4-6, 6-3, 6-3. Kumta hadien katei ka jingjop bad ka jingrung sha ka jingiakhun quarterfinal ha ka sien ba nyngkong jong ka aiom ialehkai ba mynta, u Cecchinato un hap ban pynkhreh ruh na ka bynta ban iakhun sa bad u Alejandro Davidovich Fokina.
