Singapore, Iaïong:
Kawei ka nongtrei ap khyllung kaba la don 33 snem ka rta ha Singapore, ka la shah kem bad shah pynngat hapoh ki kyndon aiñ jong ka jingshah set patok ba 6 bnai kynthih, hadien ba ka la dait ia iwei na ki khun synrap kiba ka dei peit, tang namar ba im thiah ha ka por ba ka pynthiah ia ki.
Ia katei ka briew la ithuh kum ka Masita Khoridaturochmah, bad la rai ban shu set patok noh ia ka haduh 6 bnai kynthih halor ka jingleh torti jongka ia itei i khyllung kynthei da kaba pynshitom bad pynmynsaw ia i tang namar ba kam lah ban pyniohthiah ha ka por kaba biang.
Ka ïingbishar na Singapore, ka la iathuh ba ka Masita kaba long ka nong Indonesia, ka la sdang ban trei ha katei ka iing dei naduh u snem 2021 bad ki kamram jongka ha katei ka iing ka long ban peit ia kitei ki 2 ngut ki khun synrap bad ha kajuh ka por ruh ban trei ia katto katne ki kam iing ba rit- ba ria.
Hynrei ha ka 26 tarik jong u Jymmang, ka trai jong katei ka iing ka la mih na iing ban leit shaw skul ia kawei pat ka khun heh, ha kaba ka Masita pat ka don ha iing ban ap ia kitei ki 2 ngut ki khun synrap kiba dang don dang 1 snem 2 bnai ha katei ka por.
La ong ruh ba dei ha katei ka sngi ba katei ka nongtrei ka la pyrshang ban pynthiah ia kitei ki khyllung kumba ju leh man ka sngi, hynrei hadien kumba shiteng kynta, katei ka nongtrei ka la khie bitar hadien ba iwei napdeng jong kitei ki synrap, im shym la iohthiah satia wat haba ka la pyrshang ban kyn-oi bad pyniohthiah ia ki. Kumta katei ka nongtrei, da ka jingdom, ka la dait ia itei i khyllung na kti ka diang haduh ba ka kti jong itei i khyllung ka la mong bad sah dak.
Hadien shiteng kynta pat ba katei ka trai iing ka la wan phai, ka la leit ban pynkhreh ja miet ia ki khun rit jongka, bad ha ka por ba ka ai bam ia ki, ka la iohi liak ia katei ka bynta ba mong bad paw dien bniat jong ka kti itei i khyllung. Kumta ka la sngewthuh shai ba dei beit katei ka nongtrei kaba la dait ia i bad kumta ruh ka la kylli bad tohkit bniah ia katei ka nongtrei hynrei kam shym la phla bad ka Masita ka la kyntait beit ba kam shym la dei ma ka- kaba dait ia itei i khyllung.
Hynrei hadien ba katei ka trai iing ka la kylli shi kylli bniah, ka la lap ia ka jinglong tehteh jong katei ka nongtrei bad dei ha katei hi ka por ba ka la pyntip bad ujor sha ki pulit halor ka jingleh jongka, watla katei ka nongtrei ka la dem khohsiew bad kyrpad jur ia ka ban map bad ban ym pynshitom ne pyntip sha ki pulit.
