Ha ka jingïalang ka MDA lah ban ïatai ki MLA ka Liang Synshar halor ka ‘Roster System’

Shillong, Ïaïong 09:

Ki MLA ka Liang Synshar kiba donlang hapoh ka kynhun synrop Meghalaya Democratic Alliance (MDA) ki lah ban ïatai ha ka jingïalang jong ka kynhun synrop halor ka ‘roster system’ kaba dei ban pyntreikam hapoh ka bhah thungkam jong ka Jylla.

Ka tyllong khubor ka ïathuh ba na ka liang ki MLA kiba don ha ka Sorkar MDA-II kin sa ïakynduh ynda la wan u Myntri Rangbah u Conrad K Sangma ban ïakren halor kane namarba ka dei ka mat kaba donkam ban ïatai da ka jingsngewthuh jingmut lang kum ki trai muluk jong ka jylla khnang ban nym mih kano-kano ka jingeh kaba lah ban long ka jingma ïa ka jylla.

La ong ba u Myntri Rangbah un wanphai mynta ka taïew sha Shillong hadien ba u la leit jingleit shabar na ka jylla ha ka taïew ba la dep.

Shuh shuh la ïathuh ba ki seng saiñ pyrthei kiba don hapoh ka Sorkar MDA ruh, kin sa ïakren shwa ha la kijong kijong ki seng ïa kane ka mat ha kaba yn ïadonbynta lang ki nongkitkam jong ka seng bad ki MLA bad MDC.

Ki don ruh kiba ai jingmut ban ïatai lang ïa kane ka mat ha ka jingïalang jong baroh ki seng saiñ pyrthei.

Ka thungkam ka la sahteng ha ki tnat treikam ka Sorkar Jylla hadien ba ka Ïingbishar (Meghalaya High Court) lyngba ki ar ngut ki nongbishar, ka la pynmih ïa ka hukum ha ka 5 tarik Ïaïong, 2022 ha kaba ka la bthah ban pynsangeh shwa ïa baroh ki jingpynrung kam halor ka nongrim ba ha ka por ba khot ban thep kam ki tnat Sorkar bad kiwei kiwei ki shnat treikam kiba hap ban bud ïa ka bhah thungkam (Reservation Policy), namar ki khlem pyni satia ïa ka ‘Roster System’ lane ki khlem pyni shai katno tylli la mang ïa ki kam na ka bynta ki jaitbynriew bapher bapher katkum ka ‘Reservation Policy’ ha ka por ba khot ban thep kam.

Ka ïingbishar ka la bthah ba ka rukom pynrung kam ka lah ban bteng biang tang ynda ka jylla ka la lah ban pyni ïa ka ‘Roster System’ lane ka jingpyni shai katno tylli ki kam la mang na ka bynta ki jaitbynriew bapher bapher katkum ka ‘Reservation Policy’ lane ka jingpynbhah lypa ïa ki kam ha ka por ba khot ban thep kam katkum ka ‘Reservation Policy’.

Dang shen, na ka liang ka Voice of the People Party ruh ka la dawa ban khot da ka dorbar kyrpang ban ïatai ïa kane ka mat ‘roster system.’