Monaco, Iaïong:
Da ka jingwanphai biang sha ka ATP Tour mynta ka taiew ha ka lympung ialehkai ka Monte-Carlo Masters, ka khubor ka iathuh ba u Novak Djokovic uba long uwei na ki khlur ialehkai Tennis ba pawnam ka ri Serbia un ialam nakhmat ia ka kynhun sha katei ka lympung ialehkai kaba nyngkong jong ka Masters 1000. Ia kane ka lympung yn pyniakhun ia baroh ki jingialehkai ha Roquebrune-Cap-Martin, France kaba lah sdang naduh ka sngi U Blei (9 tarik) haduh ka 16 tarik mynta u bnai.
Kumta ha kaba iadei bad katei ka bynta, ka khubor ka iathuh ruh ba u Novak u lah ruh ban iakynduh bad u rang-ialehkai ba paw ka Italy u Jannik Sinner ha ka quarter-final bad uba lah shah buh ruh na ka bynta ban iakynduh pat sa bad u lahduh ha ka Miami Open mynta u snem uba na ka ri Russia u Daniil Medvedev ha ka jingiakhun semifinal ka jong ki ha katei ka lympung ialehkai ba myunta.
Shuh shuh ruh u Novak uba ialeh na ka bynta ban dang iai bat biang halade ia ka kyrdan ba 1 ha ka pyrthei ha ka thup kyrdan jong ka ATP, un sdang ia ka jingiakhun jong u ha ka lympung pyrshah ia u Brandon Nakashima ne bad u Mackenzie McDonald. Ha ka kylla iakhun kaba lai, u Novak u Novak u lah ban iakynduh bad u Lorenzo Musetti; ha kaba ha u snem 2021 u Novak u lah pynliem noh ia u Musetti ha ki san set iakhun jong ki ha Roland Garros bad u long ruh u nongkhur nam lahduh arsien ha katei ka lympung iakhun kaba u ialehkai mynta hadien ba u lah dep ban rah ia ka thong jingjop ha u snem 2013 bad 2015.
Kumjuh ruh u Jannik Sinner u lah poi ha Monte Carlo hadien ba u lah rung sha ka jingiakhun phainal ha ka sien kaba ar ha ka ATP Masters 1000 bad mynta ka sien ha Miami, ha kaba un sdang ia ka jingiakhun jong u pyrshah ia u Diego Schwartzman ne bad u David Goffin ha ka jingialehkai ba nyngkong ka jong u ha une usnem ba mynta.
Kumjuh ruh u Medvedev uba iakhun na ka bynta ban khur ia ka nam jop ba nyngkong na kum katei ka lympung ialehkai ha khyndew-saw, un pynkhreh na ka bynta ban iakynduh bad u Lorenzo Sonego lane bad uban shah jied sha ka lympung ialehkai ha ka jingakhun ba nyngkong ha shuwa ba un iakynduh bad u khlur ialehkai ba paw na Germany u Alexander Zverev ha ka kylla iakhun kaba lai.
