Shillong, Ïaïong 09:
U kyrtong ka United Democratic Party (UDP), u Bah Synshar Lyngdoh Thabah un sa thep kyrteng ha ka 14 tarik mynta u bnai ban ïakhun ïa ka ilekshon kaba dang sahteng ban pynlong ha Sohïong konstitwensi.
Ka jingthep vote ha Sohïong konstitwensi kaba dei ban long lang bad kiwei pat ki 59 tylli ki konstitwensi ha ka 27 tarik Rymphang, 2023, la buhteng noh da ka Election Commission of India namar ka jingkhlad kyndit u kyrtong ka UDP, u Bah HDR Lyngdoh ha ka 20 tarik Rymphang, 2023.
Katkum ka jingïathuh ki nongïalam ka UDP sengkmie, u Bah Synshar uba dei u pyrsa jong u Bah HDR Lyngdoh un sa leit ban thep kyrteng kum u kyrtong hakhmat u Returning Officer ha ka 14 tarik mynta u bnai ha ka por 1 baje nohphai sngi.
Ki nongïalam ka UDP naduh u President Bah Metbah Lyngdoh lem bad kiwei pat ki nongïalam bad ki nongkyrshan ka UDP na Sohïong kin sa leit synran lang ha katei ka sngi.
Ha kane ka ilekshon kaba dang sah ha Sohïong, dei sa tang u kyrtong ka UDP uba dang lah ban thep kyrteng, katba kiwei pat ki seng ne kyrtong kim lah shuh ban thep kyrteng thymmai, namar ïa kito kyrtong kiba la dep thep kyrteng ha u Rymphang, 2023, la dep ban pynskhem ïa ki katkum ki kyndon pynïaid ilekshon.
Kiwei pat ki kyrtong kiba la dep pynskhem lypa ki long u kyrtong ka NPP u Bah Samlin Malngiang, u kyrtong ka Congress u Bah Osborne Kharjana, u kyrtong ka HSPDP u Bah Sandondor Ryntathiang, u kyrtong ka BJP u Bah Eric Kharbuki, bad u kyrtong ka TMC u Bah Stoding Thabah.
U Bah Samlin u dei u MLA barim ka Sohïong uba la iehnoh kam kum u MLA ka HSPDP bad ïasoh noh sha ka NPP bad long kum u kyrtong ha kane ka ilekshon.
Ban thep kyrteng na ka bynta ka ilekshon kaba dang sah ha Sohïong, ka Election Commission ka la buh sngi naduh ka 13 tarik haduh 20 tarik mynta u Ïaïong, bad ka sngi ban peit bniah ïa ki kot ki sla jong ki kyrtong ka dei ha ka 21 tarik. Ka tarik kaba khatduh ban weng kyrteng ka dei ha ka 24 tarik.
Ka Sohïong konstitwensi ka don 63 tylli ki jaka thep vote bad baroh ki nongthep vote ha Sohïong ki don 34,783 ngut kiba kynthup 17,096 ngut ki shynrang bad 17,687 ngut ki kynthei.
Ka jingïakhun ha Sohïong kan dei hapdeng ki seng saiñ hima kiba don ha ka Sorkar bad ki seng kiba don ha ka Liang Pyrshah. Kane ka ilekshon ka dei ruh ka jingïakhun ban ïoh kham bun paid ha Ïingdorbar Thawaiñ, la ka dei ïa ka NPP, UDP, HSPDP bad BJP ne Congress bad TMC.
Ka NPP kaba ïalam ïa ka Sorkar, ka la don lypa 26 ngut ki MLA, katba ka UDP ka don 11 ngut ki MLA, bad ka HSPDP bad ka BJP ki don mar 2 ngut ki MLA. Ka Congress bad ka TMC kiba don sha ka Liang Pyrshah, ki la don lypa mar 5 ngut ki MLA.
Lada ka Congress ne TMC kan ïoh jingjop ha kane ka ilekshon, kawei na ki, kan ïoh ruh ban shim ïa ka kyrdan nongïalam Liang Pyrshah ha Ïingdorbar Thawaiñ namar donkam ban don 6 ngut ki MLA ban ïoh kam ïa ka kyrdan nongïalam Liang Pyrshah.
