Shillong, Ïaïong 09:
Ka Shillong Lajong Football Club ka la lah ban pynliem sa ïa ka Diamond Rock Football Club ha ka jingïalehkai ba ar na Group B jong ka lympung Second Division League kaba la long ha Balaghat, Madhya Pradesh ha ka sngi U Blei.
Ha kane ka jingïalehkai, ka Shillong Lajong ka la jop da 1-0 kol ïa ka Diamond Rock bad ïa kane ka shi kol la ïoh ban thep da u Hardy Cliff Nongbri ha ka minit kaba 68 jong ka jingïalehkai. U Hardy u la khur ruh ïa ka khusnam ‘Player of the Match’ ha kane ka jingïalehkai.
Ka Shillong Lajong ka la sdang ïa kane ka lympung jong ka Second Division, kaba dei ka lympung hapoh jong ka I-League, da ka jingjop pyrshah ïa ka East Bengal Reserves ha ka 4 tarik mynta u bnai, kata da 1-0 kol.
Ha kane ka jingïalehkai pyrshah ïa ka Diamond Rock, u Coach Bah Bobby Lyngdoh Nongbet u la bujli tang uwei u rangïalehkai ha kaba u la wanrah da u Babysunday Marngar ha ka jaka jong u Amon Lepcha.
Ha kawei pat ka jingïalehkai jong ka Group-B, ka United Sports Club bad East Bengal Reserves kiba dei ki kynhun na Kolkata, ki la ïakhaid noh hadien ba khlem don ba ïoh pynkhih jar.
Lyngba ka jingïakhaid jong kine ki ar tylli ki kynhun na Kolkata, la sngewthuh ba ka Shillong Lajong ka la don ha ka kyrdan ba nyngkong ha ka Group-B kata hadien ba ka la khur 6 point, katba ka United SC ka la ïoh 4 point, ka East Bengal Reserves 1 point bad ka Diamond Rock kam pat ïoh wat tang shi point ruh.
Ka lahduh na ka group bad ruh ka kynhun ba tbit tam na kiba wan ba-ar ha ka group kin ïoh rung sha ka final round jong kane ka lympung.
Ka jingïalehkai ka ban wan jong ka Shillong Lajong kan long ha ka 14 tarik mynta u bnai ha Shillong pyrshah ïa ka United SC bad ka jingïalehkai la buh ban pynlong ha First Ground, Polo, hynrei lada kane ka madan, ïa kaba dang shu siang phlang plastic kam pat long kaba la khreh ha ka por, kumta hap ban rah noh shawei ïa kane ka jingïalehkai.
