Shillong, Ïaïong 09:
U paidbah ba bun ba lang ha ka Sngi U Blei u la leit ban synran bad ïashim bynta ha ka jingleh burom khatduh ïa ka met ba dang sah jong u nongthoh khubor ba rangbah ka Jylla, u Bah Sumar Sing Sawian ha kaba la pyndep ïa ka niam ka rukom ha u Lum Jingthang ka Seng Khasi Kmie, Jaïaw.
Ka Jylla ha ka Sngi Thohdieng ka la duh noh ïa uwei na ki radbah ka jaidbynriew uba la noh synñiang shi kat dei sha ka thoh ka tar jong ki Khasi, u Bah Sumar Sing Sawian ha ka rta kaba 82 snem.
U Bah Sumar u la khlad noh ha ïingsah lajong kaba ha Umroi, Ri-Bhoi District ha ka por kumba 10 baje mynmiet.
Haba ïakren bad ‘U Nongsaiñ Hima’, u Bah Wallamphang Roy Sawian (uba shipara arkmie bad u Bah Sumar), u la ong ba u Bah Sumar u long u briew uba trei shibun ki kam bad u ’riewdon sap ha kiba bun ki liang.
U Bah Sumar u la sdang ïa ka jingpule jong u ha St. Edmund’s School ha u snem 1947.
“I long iba don sap bha ha ka put ka tem, ka rwai ka siaw, i nang ban tem ïa kiba bun jait ki jingtem bad i ju tem bha ïa ka ‘Piano’. Ha ka por ba dang samla i ju tem ruh ïa ki jait jingtem ‘Jazz’ ha Bombay (ha kito ki por),” la ong u Bah Sawian.
Haba ïathuh ba u Bah Sumar u long u nongthoh jong kiba bun tylli ki kot, u Bah Sawian u la ong ba ki katto-katne ki kot kiba kham paw jong u ki kynthup ïa ka kawei kaba la thoh halor ka niam Khasi kaba la ai kyrteng ‘Ka Jutang’, ka ‘Khanasamari’ bad kiwei-kiwei.
“I don bynta ha ka ban sdang ïa ki skul ha ki jaka nongkyndong kum ha Nongtraw, Mawbseiñ bad kiwei-kiwei ki jaka,” u la ong.
Haba phai sha ka kam thoh khubor, u Bah Sawian u la ïathuh ba u Bah Sumar u la synñiang ïa ki jingthoh jong u ha ka rukom jong ki artikle bad dei ma u, uba la sdang ïa ka kot khubor ‘Apphira’ ha ka ktien Khasi kaba ju mih shisien shi taïew bad hadien ha ka phareng.
U Bah Sumar uba la trei bad ka Press Trust of India (PTI) ha Delhi u la long ruh u Bureau Chief ba nyngkong eh napdeng ki Khasi jong ka PTI, Shillong.
Ha kajuh ka por u la ïadon bynta ruh bad ka All India Radio.
Katkum ka jingïathuh u Bah Sawian, u Bah Sumar u la long ruh u dkhot ka Jylli Pyrkhat Kam (JPK) jong ka Seng Khasi Kmie.
“I long uwei na ki nongsdang ïa ka jingkiew Lum Sohpetbneng bad dei lyngba ka jingtrei shitom jong i ba kane ka jingkiew kan sa long kumba ka long mynta. I la synñiang shi kat dei sha ka seng lyngba ki jingthoh shaphang ka seng, ka jingshad, u khnam ka ryntieh nalor kiwei-kiwei kiba ïadei bad ka seng,” u la ong.
U Bah Sumar u la sdang ruh ïa ka ‘Rong Biria u Khasi’, ne ka ïasiat khnam, lyngba ka ‘Apphira Archery’ kaba ju pynlong man u snem ha u bnai Rymphang.
Shuh shuh u Bah Sumar u la don bynta ha ka ban pynkylla Khasi shi bynta ïa ka ‘Geetanjali’ jong u Rabindranath Tagore.
Nalor kane, u la ïoh pdiang ïa bun tylli ki khusnam ba kynthup ïa ka khusnam ‘U Tirot Sing’ halor ka ‘Arts & Literature’.
