Shillong, Ïaïong 09:
Ki ar ngut MLA kiba ïatreilang ha ka sorkar Meghalaya Democratic Alliance-2 ki lah ban leit pynïasoh pura noh ha kine ki sngi sha ka National People’s Party (NPP) kaba dei ka seng kaba ïalam ïa ka sorkar jylla.
Katkum ki khubor kiba la ïoh lum la ïathuh ba kine ar ngut MLA ki lah ban leit pynïasoh shwa ba ki paidbah ka Sohïong konstitwensi kin jied ïa u nongmihkhmat sha ka ïingdorbar thawaiñ ka jylla.
Kum ban shu pynkynmaw, ka Election Commission ka ri India ka la pynbna ban thep vote ha Sohïong konstitwensi ha ka 10 tarik Jymmang, 2023 bad ka jingñiew vote kan long ha ka 13 tarik jong ujuh bnai.
Kane ka jingbuhteng ban thep vote ha Sohïong ka dei hadien ka jingkhlad kyndit u Bah HDR Lyngdoh ha ka 20 tarik Rymphang 2023, kata shi taïew shwa ba ki paidbah ka jylla kin thep vote ha ka 27 tarik, Rymphang 2023.
Nalor nangta ki khubor ki ïathuh ruh ba kine ar ngut ki MLA ki lah ban dei na ki saw tylli ki seng saiñ pyrthei kiba leit kyrshan ïa ka NPP ha ka sorkar MDA-2 ba ïalam da u Conrad K Sangma.
Kine saw tylli ki seng saiñ pyrthei kiba kyrshan ïa ka sorkar NPP ki kynthup ïa ka UDP 11 ngut, BJP 2 ngut, HSPDP 2 ngut bad PDF-2 ngut bad 2 ngut ki MLA shimet.
Ki khubor ki ïathuh ba lada kine ar ngut MLA ki leit ban pynïasoh sha ka NPP ka jingdon ki MLA ha kane ka seng ka long palat 28 ngut bad kin trei shitom ban pynjop ïa u kyrtong ka NPP na Sohïong konsittwensi u Bah Samlin Malngiang khnang ban ïoh 29 ngut ki MLA.
Nalor kata, ki khubor kiba ïajan bha ki ïathuh ba lada ka NPP ka la lah ban poi 30 ngut ki MLA, ka mut uwei na ki seng saiñ pyrthei kiba leit ïatreilang un sa shah pynhiar shuki beit khnang ban thep sa uwei u MLA na ka seng NPP.
Katkum ka jingkren ki nongïalam ka NPP ha jingïalang ïalap ilekshon ha Sohïong ki la kyntu ïa ki paidbah ba lada ki pynjop ïa u Bah Samlin ka shuki Myntri ka la ap ïa u namar kin pynhiar shuki beit uwei na ki Myntri ha ka sorkar MDA ban pynrung ha ka jaka u Bah Samlin.
