Canberra, Iaïong:
Kum shi bynta jong ka jingnang iai pynksan bad kyntiew shuh shuh ia ka kam ialehkai kriket jong ki katto katne ngut ki thei ialehkai ka Australia, na ka liang jong ka Cricket Australia (CA) ka lah pynbna paidbah ruh ia ka thup kyrteng jong ki 17 ngut ki thei ialehkai na ka bynta ban tyrwa ha ki ia ka jingiateh kontrak ialehkai ka ri (National Contracts) na ka bynta ka aiom ialehkai 2023-24.
Ha kaba iadei bad kane ka bynta ha katei ka thup kyrteng ba thymmai mynta la ong ba ki don khat-lai ngut ki nong-ialehkai ki lah iai shah pynsah biang sa shisien ka jingiateh na ka aiom ialehkai ba la dep. Kumta ha kane ka sien kaba mynta, ka jingbun jong ki thei ialehkai kiba lah don ka jing-iateh kontrak ka lah kiew na ka 15 sha ka 18 ngut bad kata baroh ka hap hapoh ka MOU (Memorandum of understanding) ba thymmai jong ka CA lem bad baroh ki nongialehkai Kriket kiba hap hapoh ka jingpyniaid ka jong ka. Ka Grace Harris, Kim Garth bad Heather Graham ki lah shah plie ka lad ka lynti na ka bynta ka jingshah kynthup jong ki ha katei ka thup kyrteng ba thymmai jong ka CA na ka bynta ka jingiateh bad man la ki nongialehkai ki lah shah tyrwa ia ka jingiateh kontrak ha ka sien kaba nyngkongeh ka jong ki.
Kumjuh ruh kawei na ki nongialehkai kaba lah kiew bha ha ka kam ialehkai ka jong ka, ka Phoebe Litchfield ka lah ioh mynta ia ka kontrak ialehkai hadien ka jinglah jong ka ban ialehkai bha da ka jingbym pat shah pynliem ha ka jinglah ban kamai ia ki 50 ron ha ki ar jingiakhun ODIs ba nyngkong ha ka jingiakhun kaba dangshen pyrshah ia ka Pakistan.
Ka Grace Harris ka lah ioh mynta ia ka jingshah pynkiew ka jingiateh kontrak na ka jingiateh ha ka aiom ialehkai ba lah dep bad ha kajuh ka por ruh ka lah ialehkai ha man la ki jingialehkai ha baroh shi lynter jong ka T20 World Cup naba ka long ka nongialehkai kaba don sap bha ha ki kam ialehkai Kriket jong ka la ka long ha ka kam Kawang ne tied bol.
Ka thup kyrteng ba thymmai ia kaba lah pyllait da ka CA na ka bynta ka jingiateh kontrak ba thymmai ka long:
Darcie Brown, Ashleigh Gardner, Kim Garth, Heather Graham, Grace Harris, Alyssa Healy, Jess Jonassen, Alana King, Meg Lanning, Phoebe Litchfield, Tahlia McGrath, Beth Mooney, Ellyse Perry, Megan Schutt, Annabel Sutherland, Tayla Vlaeminck, Georgia Wareham.
