Orleans, Iaïong:
Ka jingiaid lynti jong u rangialehkai Badminton ka ri u Priyanshu Rajawat ha ka lympung ialehkai kaba dang iaid shakhmat mynta ka Orleans Masters Super 300 ka lah nang iai long kaba seisoh bad kaba jop. Utei u rangialehkai u lah jam mynta sha ka jingiakhun semi-final hadien ka jinglah ban khur jingjop ha baroh shi lynter jong ka jingialehkai ha ka jingiakhun pyrshah bad u rang-ialehkai na Chinese Taipei u Chi Yu Jen.
Kumjuh ruh u Rajawat uba la lah ha ka ban pynliem noh ia u Kenta Nishimoto ka Japan ha ka kylla iakhun kaba ar, ha katei ka jingiaknieh rung semifinal ka jong u pat; u la lah ban pynliem noh ia u Chi Yu Jen da 21-18, 21-18 ha ka jingiakhun quarter-final ka jong ki kaba lah neh 44 min. Kumta hadien katei ka jingjop, u Rajawat un hap ban iakhun pyrshah sa bad u Nhat Nguyen na Ireland hadien ba u Nhat u lah ioh da ka w/o na u rangialehkai na Israel u Misha Zilberman.
Kumba ka paw mynta hi ka long ba u Rajawat u dang iai bat ia ka kyrdan ba 58 ha ka thup kyrdan jong ka pyrthei, bad ha katei ka jingiakhun ka jong u ha ka jingiaknieh rung sha ka semifinal, u lah ialehkai bha bad pynsted ka rukom ialehkai jong u naduh kaba sdang bad hadien ba ka jingiakhur dor-thong ki arngut ka poi sha ka jingiaryngkat da 9-All ha ka jingialehkai ba nyngkong, u Rajawat u lah ioh ruh ban khur shalade ia ki 4 dor-thong na ka bynta ban kiew pat sha ka 13-9, katba u Chi u lah ioh tang khydiat ka por ha ka jingwanphai ka jong u bad ha kaba u Rajawat u lah khur ia ka jingjop ha kaba nyngkong hadien ba u la lah ban tam noh shakhmat da 16-15.
Ha ka jingiakhun kaba ar, u Chi u lah ioh kloi ha ka ban tam dor-thong shakhmat hynrei u Rajawat u lah ioh ban pyniaryngkat ia ki dor-thong ki jong ha ka 7-7 bad uba lah nang iai jam shakhmat sa shisien ha ka 10-All. Kumta u Rajawat u lah plie ka lynti shakhmat da lai dor-thong jingpynjngai ha ka 13-10 bad uba lah nang iai pynjlan shuh shuh ia kata sha ka saw jingpynjngai ha ka 17-13; kata ha shuwa ba un pyndep ia ka jingiakhun baroh kawei da ka jingjop.
