Belfast, Iaïong:
Uwei u briew ba 26 snem ka rta u la shah kem ha ki pulit ha Northern Ireland mynta ka taïew hadien ba u la pynïap ïa kawei ka kynthei ha Republic of Ireland.
Kane ka kynthei ka dei kaba dang ha ki rta ba 20 snem bad la lap ia ka met ïap jongka na ka jaka sah jongka ha nongbah Limerick ha ka janmiet jong ka Sngi Ba-ar.
Kumta la ong ba ka tnat Police Service of Northern Ireland (PSNI) ka la ioh kem noh ia utei u briew ha ka Sngi Palei bad la rah noh ia u naka bynta ban pyndep ia ki jingtohkit ba bniah hapoh Belfast.
U la shah pynngat ejahar ha ka Sngi Thohdieng mynmiet bad u la hap ban shah hajir hakhmat ka ïingkashari jong ka Belfast mynta ka Sngi Saitjaiñ.
Ia ka kam ban tohkit bniah halor katei ka jingpyniap jong utei u runar, yn shimti bad yn iatrei lang da ka tnat pulit PSNI bad kumjuh ruh ka tnat pulit ka Ireland hi.
