Guwahati, Ïaïong 09:
U Wolbetstar Ramsiej u la wan ha ka kyrdan ba ar ha ka jingïamareh marathon ïa kaba la tip kum ka Guwahati Half Marathon ba la pynlong da ka IIT Guwahati.
Ha kane ka Guwahati Half Marathon kaba la pynlong ha ka Sngi U Blei ka 9 tarik la don haduh palat 2500 ngut ki nongïashim bynta kaba la pynlong ïa kane ka jingïakop kaba jop.
Ha kane ka jingïamareh kaba mynta u snem, ki nongmareh ki la wan na kylleng ka ri ban ïashim bynta ha kane ka jingmareh kaba la pynlong ruh halor ka phang ‘Run for Zero Hunger’.
Ha kane ka sngi, u Gyanendra Pratap Singh, DGP ka Assam Police u la ïadon lang kum u kongsan, katba u Dr. Nitul Gogoi, IPS IGP bad ka Sarmistha Baruah, APS ki la ïadon lang kum ki symbud kongsan.
Namar ka jingbun palat jong ki nongïashim bynta kiba la wan na kylleng, kumta ïa kane ka jingïa mareh la phiah ha ki lai bynta, kata ka Glory Run, kaba dei ka jingmareh kaba 21 kilometer, ka Spirit Run kaba dei tang 6 kilometer kaba dei tang na ka bynta ki nongshong shnong ka Guwahati bad ka General Championship kaba dei thik tang na ka bynta ki skul bad kolej.
Ïa ka jingmareh la sdang da ka Professional Marathon kaba 21KM ha ka por mynstep ha Nehru Stadium Guwahati, Gandhi Basti bad la pynbud pat da ka jingmareh kaba 6 kilometer na ka bynta ki paidbah.
Haba phai sha ka thup ki nongjop, kata ha ka kyrdan ki shynrang ha ka 21 km, u Korie James Kipleting u la wan ba nyngkong, u Wolbetstar Ramsiej u la wan ba-ar bad ka kyrdan ba lai ka la leit sha u Pawan Kumar Singh.
Ha ka liang ki kynthei pat, ka Renu Singh ka la wan ba nyngkong, ka Sanghamita Mahata ka la wan ba-ar bad ka Shyamali Singh ba-lai.
Ha ka jingmareh kaba 6 kilometer ki shynrang pat, u Daniel Wahlang u la wan ba nyngkong, u Mehdi Hassan ba-ar bad kyrdan ba-lai sha u Sainkupar Jyrwa.
Ha ka liang ki kynthei pat ka Pahi Kept ka la wan ba nyngkong, ka Sabina Rai ba-ar bad kyrdan ba-lai sha ka Sangria Terrapin.
