Shillong, Ïaïong 09:
Ka President jong ka ri, ka Droupadi Murmu ka la shong da ka liengsuiñ ïakhun thma Sukhoi 30 MKI kumba 30 minit ha kaba ka liengsuiñ ka la tawiar ïa ka Brahmaputra bad ka them Tezpur ha kaba la ïohi kyndiang ïa ki bynta jong ki lum makashang ha kane ka sngi Saitjaiñ ba la dep.
Ka President ka la poi ha Tezpur Air Force Station ha Assam ban shim ïa kane ka sienjam kum ka President kaba lai bad ka President kynthei ba ar ban her da ka liengsuiñ ïakhun thma.
Ïa kane ka liengsuiñ la ñiah da u Group Captain u Naveen Kumar, uba dei u Commanding Officer ka 106 Squadron. Ka liengsuiñ ka la her sha suiñ kumba 2 km na sla duriaw ha ka jingsted kaba long 800 km ha ka shi kynta.
Hadien ba la dep her da kane ka liengsuiñ, ka President ka la thoh ki kyntien ha ka kot sahkynmaw ha kaba ka la pynpaw ïa ka jingsngew kaba kmen haduh katta katta ban her da kane ka liengsuiñ Sukhoi-30 MKI jong ki shipai suiñ.
“Ka long kaei kaei ka jingsarong ïa ka tnat ïada ri halor ka jinglah jong ka ban pynïar ïa ka jingshakri ha ka ryngkew, suiñ bad duriaw. Nga ai khublei ïaroh ïa ka kynhun shipai suiñ bad ïa ka kynhun Air Force Station Tezpur baroh kawei kaba la pynlong ïa kane ka jingher da ka liengsuiñ,” la ong ka President ha ka jingthoh jong ka ha ka kot sahkynmaw.
Na ka liang ki heh shipai suiñ ki la batai ïa ka President shaphang ka rukom treikam bad jinglah jong kane ka liengsuiñ bad ki shipai suiñ bad ka la pynpaw ka jinghun halor ka rukom pynkhreh jong ki shipai suiñ.
Kum ban pynkynmaw, ha u Lber mynta u snem, ka President ka la leit jngoh ruh ïa ka INS Vikrant bad ka la ïa phylliew jingmut bad ki ophisar.
