Shillong, Ïaïong 10:
Ka Shillong Lajong Football Club (SLFC) ka la wer ïa ki paidbah ka jylla ba kin wan ai jingkyrshan ïa kane ka klob ha ka jingïalehkai kaba nyngkong ha la ïing jong ka Second Division League ka ban long ha ka Sngi Thohdieng (14 tarik) pyrshah ïa ka United Sports Club kaba na Kolkata.
Ïa kane ka jingïakhun yn pynlong ha madan Third Ground, Polo ha ka por 2 baje noh phai sngi.
Ha ki ar tylli ki jingïalehkai ba la dep, ka Shillong Lajong ka la lah ban pynliem ïa ka East Bengal da 1-0 kol bad ha ka Sngi U Blei ka la jop ïa ka Diamond Rock Football Club na Madhya Pradesh da 1-0 kol.
Haba ïakren bad ki nongthoh khubor ha ka Lah Sngi U Blei, u Assistant Coach ka Shillong Lajong u Bah Seibor Sana u la pynpaw ïa ka jingsngewkmen ba kane ka kynhun ka la lah ban ïalehkai bha ha ki ar tylli ki jingïalehkai ba la dep jong kane ka jingïaknieh rung sha ka I-League. “Ngi sngewkmen ba ha kane ka lympung ïalehkai jong ka Second Division, ki rangïalehkai ki la lah ban ïalehkai bha naduh kaba sdang bad nga kyrmen ba kin dang lah ban ïalehkai bha.”
Wat la kane ka kynhun ka la shah pynhiar kyrdan na ka I-Legue ha u 2019, hynrei ha kane ka kynti kaba mynta ka la khmih lynti ban ïakhun tyngeh na ka bynta ban wanphai biang sha katei ka lympung.
“Nga da kyrpad rit ïa ki paidbah nongkyrshan ba kin wan ban ai mynsiem ïa ka kynhun ha kane ka jingïalehkai kaba nyngkong ka ban long ha ïing pyrshah ïa ka United Sports Club kaba na Kolkata ha ka Sngi Thohdieng.”
Ka Shillong Lajong kan pynkhreh ruh ïa ka jingïakhun ba ar ha la ïing ha ka 19 tarik pyrshah ïa ka Diamond Rock Football Club bad ïa ka East Bengal ha ka 29 tarik.
