Astana, Iaïong:
U nongialympat ba dang khynnah ka ri India u Rupin u la lah ban ialehkai bha tat haduh ba un da ioh syndon ban khur shalade ia ka takma rupa na ka kyrdan ialympat 55kg ki shynrang ha ka Greco Roman. Kane kan dei ka takma ba nyngkongeh ba u lah khur hadien ba u lah kiew sha ka kyrdan ialympat jong kiba lah san ha ki jingialympat shabar ri bad pynlong ruh ia ka ri baroh kawei kaba jop da ka jinglah jong u ban ialehkai bha naduh kaba sdang ka jingiaid lynti ha kata ka lympjng ialehkai kaba mynta ka Asian Wrestling Championships haduh ka rynsan iakhun phainal ka jong u.
Kumta, naba utei u rangialympat ba dang 19 snem ka ri u lah pyndep ia ka jingiaid lynti ha ka lympungda kaba wan ba-ar , u Neeraj (63kg GR) bad Sunil Kumar (87kg GR) ki long kiwei pat ki rangialympat ka ri kiba la lah ban khur shalade ia ka takma Rnong. Ha kaba iadei bad ka jingshah rem bad wan ba-ar u Rupin ha ka jingiakhun ka long hadien ka jingshah pynrem noh da 1-3 ha u rangialympat ba tbit na Iran u Poya Soulat Dad Marz ha ka phainal. Shuh shuh ha ka jingiakhun, u Rupin u lah sdang ia ka jingiaid lynti da ka 16-7 jingjop da ka Technical Superiority halor u nongialympat na Kyrgyzstan u Sardarbek ha ka qualification round. Hadien kata u lah pynliem ruh sa ia u rangialympat na Kazakhstan u Amangali Rahimbayev bad ia u nongialympat na China u Zhang Haifeng ha ka rynsan iakhun quarterfinals bad semifinal ruh kumjuh.
Haba phai sha ka jingialympat ha ka kyrdan 63 kg, u Neeraj u lah pynliem noh ia u nong South Korea u Jinseub Song da 5-2 na ka bynta ban khur ia ka takma Rnong katba u Sunil Kumar pat ia u nongialympat na Japan u Masato Sumi da 4-1 ha ka jingiaknieh ia ka takma Rnong na ka kyrdan ialympat ha ka 87kg. Ha ka qualification round, u Neeraj u lah pynliem noh ia u nongialehkai na Kyrgyzstan u Dastan Kadyrov da 7-6, hynrei uba lah shah rem noh ha u nong Iran u Imam Hossein Khoon Mohammadi da 0-9 ha ka quarterfinal hynrei uba lah iohlad biang sa shisien kata ha ka Repechage hadien ba u Mohammadi u lah jam sha ka phainal. Kumta ka jingiohlad jong u ka pynlong ia u tei u rangialehkai ban khur ia ka takma Rnong da kaba pynliem noh ia u Song.
