Shillong, Ïaïong 10:
U Symbud Myntri Rangbah ka jylla, u Bah Prestone Tynsong, u la ong ba ka sorkar kan sa khot da ka jingïalang jong baroh ki seng saiñ pyrthei (all party meeting) na ka bynta ban ïakren bad ïatai halor ka roster system da kaba buh sharud ïa ka jingkhot dorbar kyrpang ba la dawa da ka seng Voice of the People Party (VPP) ban ïatai halor kane ka mat.
U la ong ba ïa kane ka jingïalang yn sa khot ynda u Myntri Rangbah ka jylla un wan phai sha nongbah Shillong.
Ha kajuh ka por u Bah Prestone u la ong ba ka Sorkar Meghalaya Democratic Alliance (MDA)-2 ba ïalam da ka National People’s Party (NPP) ka la rai ruh ban sa rah ïakren bad shim rai halor ka jingpyntreikam ïa ka Roster System ha ka jingïalang ban wan jong ka Kynhun Myntri.
Kane ka jingpynpaw ban sa khot ïa ka jingïalang jong baroh ki seng saiñ pyrthei ka dei ruh hadien ba la mih ka jingdawa ban pynlong ïa ka Dorbar Kyrpang na ka bynta ban ïatai halor ka kam ba ïadei bad ka Roster System bad ka State Reservation Policy, kaba la mih ruh na ka hukum ba dang shen jong ka ïingbishar Meghalaya High Court.
U Bah Prestone u la pynpaw ba um ïohi satia ïa ka jingdonkam ban khot ïa kata ka Dorbar Kyrpang halor kane ka kam.
“Hynrei, ngam ong satia ïa kane mynta. Ynda u Myntri Rangbah u la wan phai sha Shillong, ngi la don jingthmu ban khot ïa ka jingïalang jong baroh ki seng saiñ pyrthei. Ngi kwah ban lum shuwa ïa ka jingïalang ka MDA bad ngin don ka jingïakren ba sani ha ka Kynhun Myntri bad hadien ngin sa shim rai lehse ban khot ïa ka All Party Meeting ha kaba ngin lah ban ïasam jingtip bad ïakren ïa kiei kiei baroh bad ki seng saiñ pyrthei,” la ong u Bah Prestone.
Shuh shuh haba kylli, u Symbud Myntri u la ong, “Ka khana ka long kaba jrong bha, bad ngan ïathuh ïa phi kawei, ngi la dep file ïa ka affidavit haduh lai sien bad ha katei ka por ka ïingbishar Meghalaya High Court (ha ka hukum ba ha shuwa) ka la ong ba phi hap ban pyntreikam ïa ka Roster System naduh u snem 1972. Ka la kren shai ba kan long naduh ba sdang treikam ka Reservation Policy kaba mut ba ngi hap ban phai dien biang sha u snem 1972”.
“Hynrei da ka hukum ba pynmih khatduh jong ka ïingbishar, ngin sa shong biang, ngin sa ïakren ha ka Kynhun Myntri, ngin sa ïakren ha ka MDA bad hadien ngi lah ban khot wat ïa ka All Party Meeting,” la pynkut u Bah Prestone.
