Shillong, Ïaïong 10:
Ka Meghalaya Football Association (MFA) ka la pynbna paidbah ba kan sdang noh ïa ka lympung ïalehkai Meghalaya State League (MSL) kaba lai naduh 5 tarik u Jymmang mynta u snem.
Kane ka wan biang hadien lai snem ba kam shym la lah ban pynlong na ka daw ka jingshah pynthut ha ka khlam COVID-19.
Ïa kane ka lympung yn pynlong ha ki saw tylli ki jaka; ha Shillong Zone (Ri Bhoi & East Khasi Hills), Tura Zone (Garo), Jowai Zone (Jaiñtia Hills) bad ha Mawkyrwat Zone (West Khasi Hills).
Ïa ki jingïakhun semi final yn pynlong ha ïing bad shabar (home & away), katba ka jingïakhun final yn pynlong ha ka nongbah Shillong. “Kane ka dei ka sien kaba nyngkong ba ngin pynlong ïa ka MSL ha ka nongbah Shillong namar ha ki snem kiba la lah ngi la pynlong beit shabar,” la pynpaw u Tournament Director jong ka MSL bad uba bat ruh kum u Treasurer ka MFA u Bah Wanshanbor Kharkrang haba ïakren bad ki nongthoh khubor ha ka Lah Sngi U Blei.
Ha kane ka lympung ki don haduh 25 tylli ki kynhun kiba la ïoh rung sha kane ka lympung, kynthup ïa ki kynhun ki la khur jingjop ha ki lympung ïaknieh kiba la dep ban pynlong ha u snem ba la lah. Kine ki kynthup ïa ka Mawlai SC (SSA), 7 Wasa United (WJDSA), Pyndengrei SCSC (NDSA), Chipakkore FC (DFAT), Jyntru (RBDSA), Rymbai Iawpynsing SC (EJHDFA), Mawten SC (MDSA), Warima Youth Club (WDSA), Seng Samla Laitryngew (SSA- Sohra), Mulait United FC (SASA), Riangdo Youth Sports & Cultural Association (MSA), Wasa FC (RSA), Umkseh SC (TASA), Sein Pynbhalang SC (LBSA), Seven United Sports Social & Cultural Club (PDSA), Atong Matrik FC (BDFA), Langsning FC (SSA), Rangdajied United FC (SSA), Lumdiengngan SC (EBSA), Khliehmawlieh YC (NDSA via Playoff), Umrit SC (WRBSA), Ladthadlaboh SC (WJDSA via Playoff), Shillong Lajong FC (SSA via Playoff), Selsella Sports Association (DSAT via Playoff) bad ka Youth Club Pdengkarong (ASSA).
Ka jingplie ïa kane ka lympung kan long ha ka 5 tarik u Jymmang ha Jowai da ka jingïakhun nyngkong hapdeng ka Rangdajied United Football Club pyrshah ïa ka Hynñiew Wasa FC.
“Ki don 21 tylli ki synjuk kiba la pynïasoh sha ka MFA. Na ka daw ba ki la ïa ïaid shakhmat ban pynlong tista ïa ki lympung ïalehkai, te kumta ngi la plie biang sa saw tylli na ka bynta (slot) kito ki kynhun kiba kham biang bad kiba wan ba-ar na ki synjuk bapher bapher. Haba kheiñ lang ki la don haduh 25 tylli ki kynhun ki ban ïashim bynta ha kane ka lympung,” la bynrap.
U Bah Wanshan u la ïathuh ba ka lahduh ha kane ka lympung kan ïoh rah ïa ka song pisa kaba T. 5 lak, katba ka kynhun ban wan ba-ar kan ïoh T. 3 lak. “Kumba ka long hi kito ki synjuk kiba pyndep ïa ki lympung ïalehkai kin ïoh ïa ka jingïarap pisa kaba T. 2 lak tyngka na ka Sorkar Jylla lyngba ka tnat ïalehkai, katba ki klob kiba khur ïa ka nam lahduh ha kito ki lympung kin ïoh mar T. 1 lak tyngka.
“Ka Shillong, Tura, Jowai, bad Mawkyrwat Zone kiba pynlong ïa ka MSL kin ïoh ïa ki lad ïarap na ka Sorkar. Kumjuh ki kynhun ki ban ïoh rung sha ka MSL kin ïoh T.1 lak, katba ki saw tylli ki kynhun ki ban rung sha ka semi final kin ïoh mar T. 1 lak. Ka lahduh kan ïoh T.5 lak bad kaba wan ba-ar kan ïoh T. 3 lak. Kumta haba kheiñ kyllum lang ka kynhun ka ban khur ïa ka nam lahduh kan ïoh haduh T.7 lak, katba kaba wan ba-ar kan ïoh T. 5 lak,” la bynrap u Bah Kharkrang da kaba pynpaw ba ïa ki prokram ïalehkai yn sa pyllait ha shwa ban sdang kane ka lympung.
Kum ban shu pynkynmaw, ka Shillong Lajong ka la khur ïa ka nam lahduh ha u 2019 hadien ba lah pynliem ïa ka Rangdajied United lyngba ka tie-breaker da 3-0 kol.
