Shillong, Ïaïong 10:
Ka ïingbishar ba hakhlieh duh ka ri ha ka Lah Sngi U Blei ka la ong ba kan sa tian bishar ha u Naitung ïa ka jingkyrpad ka Sorkar Meghalaya haba ïadei bad ka rai jong ka ïingbishar ka Jylla ban pynsangeh shuwa ïa ka soskular ba la ïasoi hapdeng ki Myntri Rangbah ka Assam bad Meghalaya halor ki kam pynbeit pud.
Ka kynhun ba kynthup ïa u Chief Justice D.Y. Chandrachud bad ki Justice – P.S. Narasiha bad J.B. Pardiwala ong ka jingkyrpad, kaba la dei ban shah buh thup ha ka sngi ka bym da kham bun kam, la pynbeit bakla da kaba buh thup ha ka Lah Sngi U Blei da ka Apex Court Registry.
“Ngin buh ïa kane ban bishar ha u Naitung,” la ong ka kynhun ki nongbishar.
Ka Sorkar Jylla ka la mudui ïa ka rai jong ka 8 tarik u Nohprah, 2022 jong ka ïingbishar ka Meghalaya kaba pynsangeh ïa ka soskular ba la ïasoi hapdeng ki Myntri Rangbah ka Assam bad Meghalaya halor ki kam pynbeit pud.
Kham hashwa, ka Sorkar Jylla haba kynthoh ïa ka rai ka ïingbishar ka Jylla, ka la ong ba ki mat kiba ïadei bad ka jingpynkylla ïa u pud u sam ne ka ïa kylliang ki jaka hapdeng ki 2 Jylla ki long beit ki jingkylli saiñ hima hapoh ka jingkhmih ka Executive.
