Shillong, Ïaïong 10:
Ka Federation of Khasi Jaiñtia and Garo People (FKJGP) Seng Kmie ka la pynpaw ba wat lada pyntreikam ïa ka Inner Line Permit (ILP) hapoh ka jylla kan nym don jingktah satia ïa ka kam jngohkai pyrthei.
Haba kren sha ki lad pathai khubor ha ka 10 tarik mynta u bnai, u President ka FKJGP Seng Kmie u Bah Dundee Cliff Khongsit, u la ong ka daw ba na ka liang jong ka seng ka kwah ban pynkiew ïa ka kam jngohkai pyrthei hapoh ka jylla hadien ka jingwad bniah halor ka jingduh kam duh jam ki khynnah samla bad dei tang ka kam jngohkai pyrthei kaba lah ban ai kam ai jam ïa ki khun samla ka jylla. Kumta ban twad jingmut bad ruh ban wad ki lad ki lynti na ka liang jong ka seng ka la leit sha ka jylla Sikkim kaba dei kawei na ki jylla hapoh ka thaiñ Shatei Lam Mihngi kaba kiew bha ha ka kam jngohkai pyrthei.
Une u nongïalam ka FKJGP u la ong ba na ka liang ka seng ka la pynpaw ruh hadien ka jingïakynduh ïa ka Tourist Agency Association of Sikkim (TAAS) kaba dei kawei na ki seng kaba peit ïa ki kam jngohkai pyrthei hapoh ka jylla Sikkim ha kaba la ïakren bad phylliew jingmut halor kumno ban plie ïa ki lad ki lynti ban kyntiew ïa ka kam jngohkai pyrthei.
U Bah Dundee u la ong ruh ba ka jingleit jong ka seng sha ka jylla Sikkim ka long halor ka nongrim ban kylli kumno lada ka jingpyntreikam ïa ka ILP ka ktah ne em ïa ka kam jngohkai pyrthei. U la batai ba katkum ki jingtip ba la ïoh na ka tnat jngohkai pyrthei jong ka Sikkim kaba kam ba ka jingpyntreikam ïa ka ILP kan ym ktah ïa ka kam jngohkai pyrthei lada ithuh kyrpang ïa ki nongwan jngohkai shapoh ka jylla.
U la ong ruh ba na ka liang jong ka seng ka la dep ban ïakynduh ïa ki briew kiba don bynta ban pynleit pynwan ïa ki kam jngohkai pyrthei. Halor kane kan sa don biang ka jingïalang ha ka 17 tarik mynta u bnai ka ban kyntu ïa ka sorkar kaei ba ka dei ban leh lada ka kwah ban kyntiew ïa ka kam jngohkai hapoh ka jylla Meghalaya.
Ha kawei pat ka liang ha kaba ïadei bad ka hukum ba la pynmih da ka ïingbishar Meghalaya High Court halor ka Roster System, u Bah Dundee Cliff Khongsit u la ong, na ka liang ka seng kam shym la shongthait bad ka la leit ban ïakynduh ïa u Chairman jong ka Meghalaya Public Service Commission. Na ka liang jong u Chairman u la ong ba hap ban pyntreikam katkum ki kyndon ba la ïaid.
Shuh shuh halor kane ka mat, u Bah Dundee u la ong ba kam myntoi shuh ban phaidien ïa kaei kaba la dep namar kan sa wanrah ïa kajuh ka jingeh kaba kynthup ïa ka sorkar bad ki paidbah ka jylla. Nangta u la ong ruh lada kwah ban kren ïa ka Roster System hap ban pyrkhat ban pyntreikam ïa ka Roster System jong ka Garo Hills kaba la don lypa ïa ki ophis naduh mynshwa kiba kynthup ïa ka DSC. Namarkata, na ka liang jong ka seng ka ieh ha ka jingstad jong ki nongmihkhmat ka jylla kumno ba kin ïatai khnang ba kan ym wanrah ka jingsngew ïapher jaidbynriew, hynrei ban shim ïa ka lynti kaba biang tam ym da kaba phai biang shadien, hynrei ban sdang ïa kaba shakhmat.
