Shillong, Ïaïong 10:
Ka lympung ïalehkai chess ba la tip kum ka 1st Meghalaya Invitation FIDE Chess Tournament 2023 ba la pynïaid da ka Meghalaya Chess Association, ka la poi sha kaba kut ha ka Sngi Saitjaiñ ha Sri Aurobindo Institute of Indian Culture, Shillong.
Ha kane ka sngi pynhap pyrda la ïadon lang u MLA ka Mawlai Constituency u Bah Brightstarwell Marbaniang kum kongsan, u Swapnil Tembe (IAS) kum u symbud kongsan, ki dkhot ka MCA bad kiwei.
Ïa ka nam Best Unrated la ïoh da u Raktopal Kashyap na Assam, Best Veteran (50 +) ka leit sha u Gautam Chakravarty na Assam, Best Female (U-13) la ïoh da ka Amaziah bad ka Gapesa Marak na Meghalaya, katba ïa ka nam Best Meghalaya (Male) la ïoh da u Ganesh Rai bad Best Meghalaya (Female) la ïoh da ka Gargee Chakravarty na Meghalaya.
Ha kane ka lympung ïalehkai kaba nyngkong eh ha ka Jylla la wan shim bynta da 96 ngut ki nongïalehkai na ki saw tylli ki jylla jong ka thaiñ Shatei Lam Mihngi kiba kynthup na ka Assam, Arunachal Pradesh, Manipur, Tripura bad 40 ngut kiba na Meghalaya.
Ïa ka nam lahduh ha ka Open la rah da u Alom Mazumdar na Assam ha kaba la kamai 8½ point, ïa ka kyrdan ba-ar la ïoh da u Singh Soram Rahul (Assam) da 8 point bad u rangïalehkai na Meghalaya u Silkam Sangma (7 point) u la wan ha ka kyrdan balai.
Kiwei pat ki nongïalehkai kiba la don hapoh ka thup kaba shiphew ki long u Talin Nimpu (Arunachal) uba la kamai 7 point, Elangbam Shashikanta Singh na Manipur (6½ point), Rijied Katrai na Meghalaya (6½ point), Jerry N. Pajat na Meghalaya (6½ point), Barbith M. Sangma na Meghalaya (6½ point), Khwairakpam Rocky Singh na Manipur (6½ point) bad u Himanish Kumar Sarma na Assam (6½ point).
Ha ka kyrdan ïalehkai Under-09 la jop da u Monodeep Dhar na Assam (4½ point), ba-ar u Abri Nayla Borah na Assam (4 point) bad balai u Advitiya na Meghalaya (4 point).
Ha ka kyrdan ïalehkai Under-13 la jop da u Koshin Das na Assam (6 point), ba-ar u Anish Goswami na Assam (6 point) bad balai u Debarati Dey na Assam (5½ point).
Ha ka Under-16 la jop da u Ashrik Shivam 1262 na Assam (6 point), ba-ar u Anubhab Das na Meghalaya (6 point) bad balai la khur da u Arghadeep Roy na Assam (6 point).
