Shillong, Ïaïong 10:
Ka United Democratic Party (UDP) ka la ong ba ka Sorkar ka dei ban khmih bniah ïa ka bhah thung kam ne ka ‘Reservation Policy’ bad thaw ïa ka lad ka bym ñiew beiñ ïano-ïano, hynrei kaba pynhun lang ïa baroh.
“Ngi sngewkhia bha haba kren halor ka ‘Reservation Policy’ bad ka ‘Roster System’. Lada phi peit ïa ki mat ilekshon ka seng, ngi ong ba donkam ban khmih bniah ïa ka ‘Reservation Policy’ kumba la pynsngew da uba bun balang ba kam long kaba biang. Kam mut pat ban shah liang ne ibeiñ ïano-ïano,” la ong u General Secretary ka UDP, Dr. Jemino Mawthoh haba kren ha ka Lah Sngi U Blei.
U la ong ruh ba ka long kaba donkam ban ïakren halor katei ka mat la ka long hapoh ïingdorbar thawaiñ ne shabar kumjuh khnang ban wanrah ka lad kaba bha tam la ka long ha kano-kano ka rukom da kaba pynshong nongrim ban ym ñiew beiñ ïano-ïano, hynrei ban pynhunlang ïa baroh.
“Haba ngi don lang ha kajuh ka Jylla, kam dei ban don kata ka jingsngewpher jaidbynriew, hynrei ban burom markylliang lyngba ka lad ka lynti kaba biang tam ha kane ka por ba mynta,” la ong u Dr. Mawthoh.
Haba kylli, u la ong ba ha ka jingpyrkhat jong u, ka jingpyntreikam ïa ka ‘Roster System’ ka dei ban long nangne shakhmat naba ka lah ban ktah ïa ka jaidbynriew Khasi-Jaiñtia lada phai dien biang naduh u snem 1972.
“Ngi dei ban lum ban lang ïa ki jingkheiñ, ki jingtip haba ïadei bad ka jingrung ha ki kam Sorkar bad ban shim pat ïa ka rai kaba pynhunlang ïa baroh,” u la ong.
Haba pynpaw ka jingsngewkhia halor ka jingkyrduh kam ki samla, u General Secretary ka UDP u la ong ba ka Sorkar ka dei ban wad ki lad ki lynti ban ïarap ïa ki samla wad kam da kaba thaw ki lad ai kam na bynta ka jingshngaiñ jong ki.
Halor ka jingpynsngew ka VVP ban khot pynlong da ka dorbar kyrpang ban ïatai ïa ka jingpyntreikam halor ka ‘Roster System’ bad ka rukom bhah kam ha ka Jylla, u Dr. Mawthoh u la ong, “Hooid, donkam ban ïakren ïa kane hapoh ïingdorbar ne shabar kumjuh namar ki paidbah ki kwah ïoh jingshai. Ha kajuh ka por, ka long kaba kongsan ïa ki nongïalam ban pynshong nongrim bha ïa kane.”
Shuh shuh u la bynrap, “Ngi kwah palat ïa kane namar ka ïingdorbar ka dei ka jaka ban ïatai, ban ïa pyni nia, ym ban ïa kawang ktieh, hynrei ban pynshong nia ïa ki jingkren.”
