France, Iaïong:
Ka jingiaid lynti jong u rangialehkai Badminton ba dang khynnah ka ri u Priyanshu Rajawat ha ka Orleans Masters jong une u snem ba mynta naduh kaba sdang haduh ka sngi pynkut ka lah long kaba seisoh bad ba jop naba utei u rangialehkai u la lah ban khur syndon shalade ia ka trophy na ka lympung hadien ka jingjop ia ka phainal pyrshah ia u rangialehkai na Denmark u Magnus Johannesen.
Kumta utei u rangialehkai ba 21 snem uba lah ialehkai kawei ka jingialehkai kum shi bynta u kyrtong jong ka kynhun ialehkai ka ri kaba la lah ban thaw ia ka khana-pateng ha ka 2022 Thomas Cup, ha katei ka jing-iakhun phainal ka jong u mynta, u la lah ban pynliem noh ia u Johannesen da 21-15 19-21 21-16 bad ka long ka jingjop kaba khraw ha ka jingim ka jong u. Kitei ki arngut kiba lah ioh rung shaduh ka jing-iakhun phainal ka long hadien ba ki lah wan sha ka lympung lyngba ka jingiaknieh rung ka jong ki bad kiba lah poi shaduh katei ka thong na ka bynta ka jingiakhun haduh ka phainal da ka jinglah ban ialehkai bha ka jong ki ha ki kylla iakhun ba hashuwa hynrei ka rukom ialehkai jong utei u rangialehkai ka ri ka long kaba kham ma-ian shibun haduh ba un da rah ia ka jingjop. Ka long ruh ka sien kaba nyngkong ba ki arngut kin iakynduh phainal, ha kaba baroh arngut ki ialeh ban jam shakhmat ha ki jingialehkai, hynrei u Rajawat u bym shym la pynlehnohei kawei ka jingialehkai ha ka lympung, u lah sei ia ka kam ialehkai ba kham sharjong ka jong u da kaba knieh noh shalade ia ki katto katne ki rukom ialehkai ba tbit jong u nongiakhun pyrshah na ka bynta ban khur ia ka jingjop ha kaba kut.
Ka khubor ka iathuh ruh ba ka long ka khet jingjop kaba lai ha kaba u Priyanshu un khur ha ka BWF World Tour Super 300 lyngba katei ka lympung ialehkai jong une u snem ba mynta.
