Shillong, Ïaïong 10:
U President ka Congress ha kane ka Jylla, u Bah Vincent H Pala, u la ong ba u don ka jingsngew skhem ba u kyrtong ka seng, u Bah S Osborne Kharjana, un long u nongjop ha kane ka ilekshon namarba ki paidbah ka Sohïong konstitwensi ki phaikhmat sha ka Congress.
Haba ïakren ha ka Lah Sngi U Blei bad u Bah Pala lyngba ka phone, u la ong ba ka MPCC kan sa lum ïa ka jingïalang mynta ka taïew na ka bynta ban ïakren haba ïadei bad ka ilekshon ha Sohïong.
U Bah Pala u la ong ba ka Congress kum ka seng kaba don ha la Liang Pyrshah ka la kren bha ïa ki mat kiba ktah ïa ki paidbah ka Jylla. Ha ka Dorbar Mang Tyngka kaba dang shu kut shen, ki MLA ka Congress ruh ki ïashimbynta bha ha ïingdorbar bad rah ïa ki jingeh ba ki paidbah ki mad nalor ki jingmut kiba ïarap ban pynbha ïa ka rukom treikam jong ka Sorkar Jylla khnang ban ïoh jingmyntoi ki paidbah.
U Bah Pala, uba dei u MP ka Shillong, u la ong ba ki paidbah ka Sohïong konstitwensi ki sngewthuh kham bha namar ki la dep ïohi ïa kiwei ki seng naduh NPP, UDP bad BJP kiba donlang hajuh bad ïatreilang para maki, hynrei ki shu kren sha ki paidbah tang ban pynthame.
“Ka Congress ka la ailad bad pynjop ïa u Maheh la bun tylli ki snem, hynrei u Maheh u la rem noh ha u snem 2018 namar ki don kiba pynrem ïa u. Kumta ki paidbah ka Sohïong ki dei ban pynjop biang ïa ka Congress ha kane ka kynti namar ka dei ka seng kaba ju ailad ïa ki nongïalam ban kiew, bad ka seng kaba burom lang ïa baroh bad kaba ju ïeng ruh ban ïada ïa baroh ki nongshong shnong,” la ong u Bah Pala.
Halor ka jingong ba ka don ka jingsngew synei namar ka jingkhlad u Bah HDR Lyngdoh, u Bah Pala u la ong ba u (Maheh) HDR Lyngdoh u la long u MLA ka Sohïong la bun phew snem na ka Congress, bad ha ka ilekshon MLA ha u snem 2018, u Bah HDR Lyngdoh um pat dei ban rem, hynrei ki don kiba trei borbah ban pynrem noh ïa u.
“Kumta ki paidbah ka Sohïong ki sngewthuh bad tip kham bha balei u Maheh u rem noh, bad haba u Maheh u la khlad noh, ki paidbah ki la kham sngew dei ban phaikhmat sha ka Congress ha kane ka ilekshon,” la ong u Bah Pala.
U Bah Pala u la ong ba ka Congress ha kane ka ilekshon MLA 2023, ka la pynïeng khnang da ki kyrtong kiba la don ka kyrdan pule bad kiba don ka jingshemphang ban long MLA kynthup ïa u Bah Kharjana uba la don bha ka jingnang jingtip bad jingshemphang, ym tang ba u shu don ka kyrdan.
Ka Congress ka don mynta 5 ngut ki MLA kiba shong sha ka Liang Pyrshah. Lada ka Congress kan jop ha Sohïong ha kane ka ilekshon, kan ïoh 6 ngut ki MLA.
Ka jingthep vote ha Sohïong konstitwensi kaba dei ban long lang bad kiwei pat ki 59 tylli ki konstitwensi ha ka 27 tarik Rymphang, 2023, la buhteng noh da ka Election Commission of India namar ka jingkhlad kyndit u Bah HDR Lyngdoh ha ka 20 tarik Rymphang, 2023, kum u kyrtong ka United Democratic Party (UDP).
Ha kane ka ilekshon kaba dang sah ha Sohïong, dei sa tang u kyrtong ka UDP uba dang lah ban thep kyrteng, katba kiwei pat ki seng ne kyrtong kim lah shuh ban thep kyrteng thymmai, namar ïa kito kyrtong kiba la dep thep kyrteng kham mynshwa, la dep ban pynskhem ïa ki katkum ki kyndon pynïaid ilekshon.
Kiwei pat ki kyrtong kiba la dep pynskhem lypa ki long u kyrtong ka NPP u Bah Samlin Malngiang, u kyrtong ka Congress u Bah S Osborne Kharjana, u kyrtong ka HSPDP u Bah Sandondor Ryntathiang, u kyrtong ka BJP u Bah Eric Kharbuki, bad u kyrtong ka TMC, u Bah Stoding Thabah.
U Bah Samlin u dei u MLA barim ka Sohïong uba la iehnoh kam kum u MLA ka HSPDP, bad u la ïasoh sha ka NPP bad long kum u kyrtong jong ka ha kane ka ilekshon.
Ban thep kyrteng na ka bynta ka ilekshon kaba dang sah ha Sohïong, ka Election Commission ka la buh sngi naduh ka 13 tarik haduh 20 tarik mynta u Ïaïong, bad ka sngi ban peit bniah ïa ki kot ki sla jong ki kyrtong ka dei ha ka 21 tarik. Ka tarik kaba khatduh ban weng kyrteng ka dei ha ka 24 tarik.
Ka Sohïong konstitwensi ka don 63 tylli ki jaka thep vote bad baroh ki nongthep vote ha Sohïong ki don 34,783 ngut kiba kynthup 17,096 ngut ki shynrang bad 17,687 ngut ki kynthei.
