D. H. Kharkongor
Ngi la nang iai iohsngew bad iai iohsngew ia kata ka ‘Reservation Roster System’ bad ia kata ka Roster Maintenance Policy’, kiba nalor ka ‘State Reservation Policy’. Nga ngeit ngi la ia sngewthuh shai ruh de ym tang ia ka jingmut jong ka kyntien ‘retrospectively’ hynrei wat ia ka jingmut jong ka kyntien ‘prospectively’. Hana kino kino ki bym hun ia kata ka ‘Reservation Roster System’ lane ia kata ka Roster Maintenance Policy’ ki don ia ka hok ba kin leit ud leit nam sha ka Ïingbishar.
Te hato, ha kaba iadei bad kata ka jingbym hun ia kata ka rukom bha kam bha jam ban thungkam thungjam, kaba kat kum kata ka ‘Reservation Roster Policy’, ba ym don shuh sieh mo da kawei pat ka lad ka lynti, kata, khlem da jam bad khlem da leit rung syndon jlang haduh ha kat ka Ïingbishar ne ka ïinglieh ïing saw? Hato ka long sieh mo kaba suk ban ia phai dieng biang bad ban ia jam dieng biang ruh tiap shi tiap, shi jam pa shi jam ne shisnem pa shisnem, tat shaduh ki 50 tylli ki snem kiba la leit noh? Te hato ha kaba iadei bad ka jinglait jong ki kam ki jam bad ruh ka jingthungkam thung jam, ka lah sieh mo ban long ba man la ka tnat sorkar ka dang kynshew bha khop tad haduh ha kine ki sngi ia baroh ki dulir ne ki jingbuh jingkhein jingdiah kiba naduh u snem 1972? Ha kaba iadei bad kane ka kam ne kata ka ‘Office Memorandum'(OM, dated 10 May 2022) kaba iadei bad kata ka ‘Roster System’ kaba kat kum ka rukom bhah kam bha jam ne ka ‘Reservation Policy’, kaba kat kum u snem 1972, ba nga ngeit ba kan kham bha pynban ban nym ia khyllie biang shuh ia kaba la leit shadien hynrei ban pyntreikam beit noh ia ka tad naduh ka sngi ba baroh ki lah ia hun ban ia mynjur lang ia ka. Ha shwa ia kata la sngewdei ruh ba kin da ia bishar bniah bha biangbin-pa-pin ia kata ka ‘OM’, ia kaba yn pyntreikam ruh ia ka nangne shakhmat ne ‘prospectively’, kata, khlem da donkam ban dang ia phai biang shadien ne ‘retrospectively’. Ha kaba iadei bad kata ka ‘OM, dated 10 May, 2022’, kaba la ngeit ba la shu pynkhreh laplah ia ka, ba donkam ban da ia shong bishar bniah bha biangbin-pa-bin, ban da ia thir bad ban da ia tai sani bha biang ruh bin ba bin, ia ka da baroh kiba dei ban ia don bynta ban saindur kham janai ia ka. Kaba kongsan tam eh ka dei ban weng noh shi syndon ne pynbeit bha noh ia baroh kita ki jingduna ki jingbakla kiba don ha ka khnang ba kum ka pyrla ne kum ka tarajur kannym noh shiliang la sha kano kano ruh ka liang. Ym lah pat ruh khlem da kum kylli lada ka State Reservation Policy -1972 ka da dei shisha ne em kata ka ‘Policy’ ne ba ka dei pynban tang ka ‘Administrative Order’.
Nga kubur ba ka por ka lah dei ban ia shong biang na ka bynta ban ia bishar bniah biang sa shisien ne ‘review’ noh shwa ia kato ka ‘Job Reservation Policy’, kaba naduh u snem 1972. Kane ka dei ka kam kaba kongsan tam eh ha shwa ban ia pyntreikam la ia kano kano ruh ka ‘Reservation Roster System’ ia kaba dei bad pyntreikam ruh ia ka naduh kata ka sngi ba yn ia mynjurlang ia ka, kata, khlem da hap ban da ia phaidien biang sha ki 50 snem kiba la leit noh. Nga kubur ruh de ba ha kaba ia dei bad ka rukom bhah kam ne ka thungkam (wat ka bhah ioh pule pyntbit kyrpang) ba ka don ka jingduna ha kato ka ‘State Reservation Policy – 1972’. Nga kubur ba naduh katei ka por (1972) hi ruh ba u Hynniewtrep u lahda kham bun paid ban ia u A’chik ba kumta ki lah ia bakla jur ba ki ia mang mar katjuh, kata, mar 40% ia u ‘A’chik bad ruh mar 40% ia u Hynniewtrep. Wat kat kum ka khana samari ne ka ‘census’ka jong u snem 2011, ba katba uA’chiku dang don tang kumba 9 lak duna u Hynniewtrep pat de u lah da kynjoh sha ka 13 lak tam. Ka jingiapher, tang ha ka liang jong ka jingbun paid shwa ruh, kaba haduh kumba 4 lak tam.Nga ngiet ka dang iai long hi kumta wat haduh ha kine ki sngi. Nga kubur ruh de ba ka kham heh ka kham iar ka Bri U Hynniewtrep ban ia ka Bri jong uA’chik. Kum ka jingpynshisha ba katba ka Bri u A’chik ka don tang 24 tylli ki ‘State Legislative Assembly Constituencies’ ba ka Bri jong U Hynniewtrep pat de ka don haduh 36 tylli ki ‘State Legislative Assembly Constituencies’. Tang halor kine ki ar ki nongrim shwa ruh ba lah dei ban ‘review’ ne pynbiet thymmai shwa noh ia katei ka ‘State Reservation Policy -1972’, kata, ha shwa ban ia shongpyrkhat sa ia kat kata ka ‘Reservation Roster System’. Ka dei ka jingshisha ba la palat 50 snem ba ka pyrla ne ka tarujur ka lah dep noh lypa sha ki A’chik.
Ka long kaba dei ban shlan ban kynto ia kane ka Sorkar MDA 2.0 ba kan khot pynlong ia ka dorbar kaba kyrpang na ka bynta kat kane ka kam. Ka kam ne ka ‘issue’kaba shisha kaba kiwei kiwei kinud ban padiah tang ha la rympei katba kim kim ju nud pat de wat tang ban shu saham ynda ki don hapoh ka Ing Dorbar Thaw Ain jong ka jylla. Kim nud wei ba ki tip shai kdar naduh na shabar ba kin nym lah ban thaw Sorkar lymne pynkhlem Sorkar khlem ka jingiasnoh kti lang ki paralok A’chik.
Thikna ba kan long pat ruh kaba eh ban dokpyniarynkat ia kaba kum kane ka jait pyrla ne tarajur, kata, ka jingpynthymmai ia ka bhah kam bhah jam kat ban ia hunlang ki arliang mamla. Lah thikna ba katba kita kiwei kin hun bad kin pdiang ia ka ba kita kiwei pat de kin sakhoh nioh mynsiem bad kin saia kyntait mardor ruh ia ka. Ym lah ruh khlem da pynkynmaw ba naduh mynno mynno nga la ju ong ba ka ‘Reservation’ ka dei pynban kawei na ki dawbah jong ka jingsah dieng ka jaitbynriew.
Te kumno lada yn shu ia pynduh pyndam beit noh ia katei ka’State Reservation Policy – 1972 ne pynduh pyndam beit noh ia ka ‘Job Reservation’? Ne kumno lada yn pynshong nongrim beit noh thik, la ia u A’chik ne ia u Hynniewtrep, tang ha ka jinglah ne ka jingtbit ne ka ‘Merit’? Ne kumno lada ban lait noh war na kum kine ki jingiathan bad ruh ban iaisah tang ka jingiabha,hapdeng u A’chik bad u Hynniewtrep, ba yn ia pynkhreh pynkhrum beit noh ban shu ia iaid beit noh la ka lynti lynti, kumba long uta U Lot bad uta U Abraham? Kitai shatai ruh la ka jong ka “A’chik ne Garo State” bad ngi ruh shane la ka ‘Hynniewtrep State’.
