Los Angeles:
Ka Marvel kumba ka paw ia mynta hi ka la mad ia ka jingduhnong bakhraw na ka daw jong ka jingbym lah ban khring ki katto katne ki phlim ba ka pynmih mynta u snem ha kaba kumba la ioh khubor ki phlim kum ka Ant-Man And The Wasp Quantumania kiba la khmih lynti ba kin long kiba iaid bha pynban ki la mad pynban ia ka jingduhnong.
Ka Marvel kaba long kawei na ki kompani pynmih phlim ba pawnam bha ha ka pyrthei bad kaba la iohlad ruh ban pynmih ia ki katto katne ki Blockbuster Film ha ki snem ba la leit katba dang iaid ki snem ka la sakhi ba ki phlim jong ka kim lah shuh ban iaid kumba long mynshwa bad kane ka la pynduhnong shisha ia kane ka kompani kaba la thmu ban sdang pynmih noh ia ki phlim kiba biang ha ki snem ban wan.
Kawei na ki daw halor ka jingbym iaid than shuh ki phlim ka Marvel ka dei ruh na ka daw ba kiwei kiwei ki kompani pynmih phlim ka Hollywood ki la sdang shim khia ban pynmih noh ia ki phlim ba itynnad.
Ha ki snem ba la leit ka Marvel ka la kamai spah bha na ka jinglah ban khring ki phlim kum ka Avengers: End Game bad kiwei kiwei bad lada ka Marvel kam shim khia ban pynmih ia ki phlim ba itynnad ka jingduhnong bakhraw kan sa mad ha ki snem ban wan bad kiwei kiwei ki kompani kin sa knieh noh ia ka nam bad kyrdan jong ka.
