Shillong, Ïaïong 10:
Ka Shad Suk Mynsiem kaba 112 kaba la pynlong lai sngi lynter da ka Seng Khasi Kmie ka la kut noh ha ka Lah Sngi U Blei hapdeng ka jingiphuh iphieng bad kaba da shongkun shong Blei.
Ha kane ka sngi, la wan ban sakhi lang ïa ka jinglong nylla bad kyrpang ka jaidbynriew Hynñiewtrep Hynñiewskum ha Lympung Weiking, Jaïaw naduh u Lat ka Jylla, u Phagu Chauhan, u Symbud Myntri Rangbah ka Jylla u Bah Prestone Tynsong, u CEM ka KHADC u Bah Titosstarwell Chyne, u DGP ka jylla u Dr L.R Bishnoi, ki heh ophisar jong ki tnat treikam bapher bapher ka Sorkar Jylla bad kiwei kiwei.
Ka Shad Suk Mynsiem kaba la ju pynlong man la u snem ha Lympung Weiking, Jaïaw, ka la sdang naduh ka sngi Saitjaiñ ka 8 tarik bad la pynkut noh ha ka Lah Sngi U Blei ka 10 tarik, ha kaba ki nongshad kiba la ïashimbynta ki long 1,451 ngut, kiba kynthup 727 ngut ki nongshad shynrang bad 724 ngut ki nongshad kynthei kiba la hiar sha Lympung Weiking ban shad ha ryngkat ka riam tynrai, kaba ishong kun shong Blei haduh katta katta, khamtam lei lei haba ki kjat sngi ba shat thaba jong ka ‘mei ngi’ ki da wan ban shat thaba ha ka riam shad kaba nylla ba hara.
Ka Shad Suk Mynsiem ka dei ka jingkynmaw bad ainguh u khun Khasi shisien shisnem ïa U Blei Trai Kynrad, U Nongthaw U Nongbuh na jrong na tbian ban neh la ka Hok, ka Riti.
Ki nongïalam ka Seng Khasi Kmie ki la ïathuh ki nongshad ki nang bun katba nang mih ki snem bad na ka liang ka seng kan dang wad lad wad lynti ban ïoh jingïarap na ki bor bapher bapher ban pynheh shuh shuh ïa ka madan shad ha Lympung Weiking.
Ka Seng Khasi Kmie kan dang wad biang ruh ïa ki jaka kiba kham biang na ka bynta ban tei ïa ka jaka shad kaba kham heh khnang ban ïoh ïashimbynta kham bun ngut ki nongshad.
Ha ka por janmiet, ynda la kut ka shad ka kmen, ki nongshad bad ki paidbah ki la mih lang na Lympung Weiking bad ïaid da ka kjat shaduh ïing Seng ha Mawkhar, ha ryngkat ki sur phawer bad ka kynhoi ka risa ha shi lynter surok ryngkat bad ka tbeh ïa ki dongmusa.
Da ki hajar ngut ki paidbah ki la tuid sha Lympung Weiking ha kine ki lai sngi ban sakhi ïa ka shad ka kmen tynrai khamtam ha ka sngi ba pynkut ïa ka shad.
Kumba ju long ha ka sngi bakut jong ka shad, ka dei da ka jingïalum lang ha ïing Seng Khasi, Mawkhar, ha kaba ki Duhalia, ki la shim ïa ka bynta ban tem ïa ka ksing lumpaid bad hadien kane, u Rangbah Banteilang Sing Rumnong, President ka Seng Khasi College bad u Chairman ka Publicity Committee ka Seng Khasi Kmie, u la shim ïa ka bynta ban pynïaid ïa ka jingïalang.
Hadien kane, u Rangbah Dipshon L. Nongbri, President Seng Khasi Mawlai, u la shim ïa ka bynta ban ïalam ïa ka duwai ka phirat, bad hadien kane, ka la dei pat ka por ba ki nongshad lem bad ki nongialam ba rangbah ka Seng Khasi Kmie, ki parakur parakha, la mih lang khrui na ïing Seng ryngkat ka sur ka ksing lynti ban iaid kjat sha Lympung Weiking, Jaïaw,
Haba la poi ha Lympung, shwa ban sdang ïa ka shad, la ïoh ïa ka nguh ka dem ba la ai ka Komiti u Tymmen U San, ïa kaba la pynbud pat da ka jingshad ha baroh ki hynñiew tylli ki skit.
Shuh shuh la wan ban synran lang ruh da u President bad Secretary ka Seiñ Raij Jowai, ki Seiñ Raij Shillong, u Dolloi ka Elaka Jowai, ki President bad ki Secretary jong ki jylli bad ki tnat ka Seng Khasi ha kaba la pyndap hi smam ïa baroh sawdong ka Lympung shad da u paid byllien, kiba da pynleit jingmut artad ha ki sur jong ka ksing, ka nakra, ka bom, ka tangmuri.
Haba kut ka shad ka kmen, shwa ban wanphai biang sha ïing Seng, Mawkhar, la ïoh ïa ki kyntien ai khublei na u Rangbah Hamar Sing Kharhmar u Cultural Secretary Seng Khasi Kmie, ka jingduwai na u Rangbah Donbokstar Kurkalang, bad la pynhiar ïa ka lama ka seng da u Rangbah Rubi Binong, President Seng Khasi Raid Marngar bad pynbud biang da ka jingduwai da uwei na ki dkhot ka Kynhun U Tymmen U San bad hadien kane, la ïaid tawiar lai sien lai wat ïa ka lympung bad wanphai noh artad sha ïing Seng, ryngkat ka phawar arted ha shi lynter lynti.
Haba la poi ha ïing Seng, u Rangbah Hainess Marbañiang, General Secretary, Seng Khasi Kmie, Mawkhar, Shillong, u la ai ki kyntien khublei bad sa pynkut da ka shad mastieh ha phyllaw jong ka Seng Khasi Hall.
Haba phaidien sha ki lai sngi jong kane ka shad ainguh ba shisien shisnem, katba nang mih ki sngi, ka dur ka dar, ka jinglong jingman jong kane ka shad ka ïai phuh ïai phieng, namar dei ha kum kane ka samoi, ba ïa ka tynrai jingngeit kaba janai bad kaba jylliew jong ka jaidbynriew Khasi, ka wan ban mihpaw ha kane ka shad, namar ka kynthei haba ka ïuhkjat ha lympung, ka da wan ha ka longrynïeng kaba khuid kaba suba banylla bad sotti. Katba u shynrang, ka riam ka beit ka jong u ka kup shisha ïa ka bynta kum u nongri nongda, u nongsumar sukher ïalade, ïa la ka kur ka jait bad ïa la ka it ka hima, ka ri ka muluk.
Ka dulir bah ban pynpaw ïa ka jinglong nylla kum ka jaidbynriew, lah ban ong ba ïa ka jubab kaba shai bad bapaw shynna eh, ka dei ha ka dur ka Shad Suk Mynsiem, kaba pynpaw ïa ka jutang kaba la ïateh hapdeng u Bynriew bad la U Blei Nongthaw Nongbuh.
Haba la bit la biang nadong shadong, u bynriew u pynpaw ka jingsngewnguh ïa u Blei Trai Kynrad da ka shad ka kmen ha ryngkat ka duwai ba U Blei Trai Kynrad un ïai thehsei ïa la ka kyrkhu kyrdoh ha u khun bynriew ba un lah ba un kai un padun, un kamai un kajih, un trei un ktah ban roi parum pareh ha snieh jong kane ka sla pyrthei, ha ryngkat ba un nang ïar ka Tip Briew Tip Blei, ka Tip Kur Tip Kha, ban ieit ïalade bad burom ïa kiwei, bad Kamai ïa ka Hok.
