Shillong, Ïaïong 10:
U MLA barim ka Mawlai u Bah Process T Sawkmie, wat la u shah rem noh ha ka ilekshon MLA kaba dang shu dep, u la ong ba kam mut satia ba u la rem un nym trei shuh, hynrei un ïai don beit bad ki paidbah ban peit ban khmih ïa ka jingeh ka jong ki.
U Bah Process u la pynpaw ïa kane haba kren ha ka jingïalang pynkup burom ïa u samla Welkin Stone Shadap uba la ïoh khur ïa ka nam Asia Book of Records kum uba sted tam ban ïaid kjat da kaba pyndep ïa ka jingïaid kjat 148 kilometer ha ka 19 kynta bad 33 minit ba la pynlong ha ka Sngi Saitjaiñ ha Mawlai Nongpdeng.
U Bah Process u la ong, “Wat la nga la rem ha ka jingïaleh, kane baroh ka dei ka jingpynïaid jong U Blei, uba tip kham bha ïa baroh. Ngi rem ryngkat bad ki kam, nga la trei shitom bha.”
“Nga sngewnguh ïa U Blei ba nga la ïoh ka lad ban shakri ïa u paidbah ka Mawlai haduh 20 snem, kata 15 snem kum u MLA bad 5 snem kum u MDC na ka bynta ban kyntiew ïa ka Mawlai ha baroh ki liang,” u la ong.
“Ha kito ki snem ba nga dang long u nongmihkhmat, ka tulop jong nga ka dei jong u paidbah, bad mynta wat haba ngam shym la jop, nga ïoh pat ka baibam (pension) bad kane ka baibam jong nga ruh kan dei jong u paidbah,” la ong u Bah Process da kaba bynrap ruh ba kane ka dei ka bynta jong u paidbah namar kum ka ïing ka sem ka dei kaba la ïoh jingkyrkhu, ha kaba i kurim bad u khun ruh ki dei kiba la don kam don jam.
“Ka bynta jong nga kum u nongmihkhmat ba la long teng jong ka Mawlai mynta nga la ïoh ka baibam, kaba dei ka bynta jong u paidbah ka Mawlai, ban ïarap sha kito kiba pang ba shitom, sha ki longïing baduk ba hiran bad mad jingeh, ban peit bad khmih ïa kiba kum kita, namar U Blei ruh u theh jingkyrkhu ïa u briew ba kynmaw ïa kiba duk,” la ong une u MLA barim ka Mawlai.
“Nga buh hakhmat ïa kiba duk ba suk jong ym tang jong ka Mawlai hynrei jong ka jylla hi baroh kawei. Kumta kam mut ba watla nga la rem, ngam trei shuh hynrei ngin don beit bad u paidbah, ka dei ka bynta ban peit bad khmih ban dang leh bha shuh shuh nangne shakhmat.
