Melbourne, Iaïong:
Ka Cricket Australia (CA) bad ka Australia Cricketers’ Association (ACA) kiba long ar tylli ki synjuk pyniaid jing-ialehkai Kriket ba paw ha ri Australia, ki lah dep ban iasoi mynta ia ka MOU ba thymmai kaba san snem kynthih. Kane ka long kum shi bynta bannang iai kyntiew shuh shuh ha kaba iadei bad ka jingsiew jong baroh ki thei ialehkai kriket kiba don hapdeng ka jingiateh kontrak.
Ka CA ka pynbna ruh ia ka jingpynkiew ia ka jingsiew na ka bynta baroh ki nong-ialehkai kiba lah iateh kontrak ha ryngkat bad ki thei ialehkai kiba long mynta ki nongjop ba khraw ia kaba yn sa kyntiew ia ka jingsiew jong ki la kumno kumno haduh 66%. Kumjuh ruh ki lympung ialehkai Kriket jong ki kynthei ki lah kylla long kiba pawnam ha kylleng ka pyrthei bad ruh ka jingseisoh jong kaba sdang ia ka bynta ba nyngkong ka Women’s Premier League (WPL) ha India.
Kumta kum ka jingpynthikna ba ka Women’s Big Bash League (WBBL) ka iaisah kum ka lympung ialeh kaba hakhmat eh na ka bynta ki nongialehkai, ka ACA ka lah pynkiew arshah ia ka jingsiew ha ka WBBL sha ka AUD$ 732,000 kawei ka kynhun ialehkai. Hadien katei ka jingiasoi ba thymmai jong ka MoU, kiba bun na ki thei ialehkai Kriket ka Australia kin hap hapoh ka jingsiew kaba da ki Million-Dollar da kaba mynjur ruh ia ka jingkamai bha da ki nongialehkai ha ki ri kiba shabar ruh kumjuh.
Kumta ki nongialehkai kiba hap ha ka CC (Centrally Contracts) mynta ki lah ban kamai haduh AUD $800,000 da kaba kyllumlang ia ka jingiateh bad ka ri bad kumjuh ruh bad ka WBBL. Ka jingkamai da 75% da ki thei ialehkai Kriket ka ri Australia ka wan khambun eh na ka WBBL bad na ki lympung ialehkai ha-iing kata na ka Women’s National Cricket League kaba mynta ka lah kiew sha ka AUD 151,000.
Na ka liang jong ka CA ka pynbna ruh ba kan sa pynkiew ruh ia ka thup kyrteng jong ka Women’s National Contract na ka 15 sha ka 18 da kaba siew 25% ka jingpynkiew jong ka ia ka bainong sha kitei ki 18 ngut ki nongialehkai.
Kumta na ka liang jong u CEO ka Cricket Australia u Nick Hockley u dap da ka jingkmen kaba khraw ha kaba u la lah mynta ban pynbna ia kata ka jingiateh kaba thymmai bad u ngeit skhem ruh ba ka jingialehkai Kriket jong ki kynthei kan iai bteng ha ka ban khie nangsan bad nangkiew shakhmat hapoh ka ri Australia bad kumjuh ruh sha ka pyrthei hi baroh kawei.
Ha katei ka MoU kaba thymmai, ka jingsiew na ka bynta ki rangialehkai Kriket ha ka Big Bash League (BBL) lah pynkiew mynta da AU$ 1 Million; ha kaba kan sa kiew ka jingsiew ka jong ki na ka AUD$2 million sha ka AUD$3million bad ruh na ka bynta ki nongialehkai ki ban sa don ha ka Central Contract, lah pynkiew ruh ia ka jingsiew jong ki sha ka 7.5% bad ka jingpynkhlain ruh ia kawei pa kawei ka kynhun ialehkai lah kyntie mynta sha ka 24 ngut ki rangialehkai ha man la kawei ka kynhun.
Ka kaiphod khubor ka iathuh ruh ba ki rangialehkai kriket kiba lah don ia ka jingiateh kontrak ha Australia, kin ioh ia ka jingshah pynkiew jingsiew sha ka 9.5 % kum shibynta jong ka jingiateh ba thymmai, ha ryngkat bad ka jingbun ki rangialehkai kiba iateh kontrak na ka 20 sha ka 24 ngut.
