Nongpoh, Ïaïong 11:
Uwei u heprit ba dang 15 snem ka rta u la duh noh ïa ka jingim katba lai ngut kiwei pat ki la mynsaw jur hadien ba uwei u dieng bah uba la pyut ki thied u la khyllem bad leit ban ïa ka ïingsah jong ki ha ka shnong Umling.
Katkum ka jingtip ba la ïoh, la ong ba kane ka jingjia ka la jia ha ka por 2 baje eiei janmiet katba kitei baroh shi ïing ki dang ïa don lang khrui hapoh ïing, hynrei kyndit-kynsan utei u dieng bah uba don mar syndah bad ka ïingsah jong ki, u la khyllem jraiñ bad ban beit ïa ka ïing haduh ba kan da pra phom.
Utei u heprit uba la duh noh ïa ka jingim ha kane ka jingjia, u dei uba dang pule ha ka klas X ha St Francis School kaba don ha Umling bad lai ngut kiba la mynsaw jur ki kynthup ïa ka para jong utei u heprit lem bad ka kmie u kpa kiba la tip kyrteng kum u Nicholas Hashah bad ka Moni Kisku.
Tang mar ïa ïoh jingtip halor kane ka jingjia, na ka liang ki pulit ka thanat Nongpoh ki la hiar mar-mar sha katei ka jaka bad ban pynkit noh ïa kiba mynsaw sha ka jaka ai jingsumar. Katba ïa ka met jong utei u heprit la pynkit noh sha Civil Hospital Nongpoh na ka bynta ban pyndep ïa ka ‘post mortem’.
