Shillong, Ïaïong 11:
Ka jingbym pynlong shuh ka Khasi Hills Autonomous District Council (KHADC) ïa ka tamasa Monolith Festival ha Khasi Heritage Village kaba don ha Mawphlang ka la pynsah khongreng ïa ki ïing trep kiba la dep shna ha kine ki snem ba la dep.
Kine ki ïing trep kiba la dang don haduh mynta ha kane ka Khasi Heritage Village hajan ka ’law kyntang Mawphlang, East Khasi Hills District ki dei ki ïing ba la shna na ka bynta ban pynsahnam ïa ki Hima Khasi kiba hap hapoh ka jingpeit ka KHADC khnang ban pyni nam ïa ki nongjngohkai pyrthei.
Kine ki ïing trep kiba la ker da ki siej la hap ban khang khyrdep noh ïa ka jingkhang namar ka KHADC ka la shu iehshrah naduh ba kam ju pynlong shuh ïa ka tamasa Monolith Festival.
Kane ka Monolith Festival la pynlong nyngkong ha u snem 2016 hadien ba la dep shna ïa ka Khasi Heritage Village da ka KHADC kaba la ai jaka sngewbha da ka Hima Mawphlang.
Ha ka por ba pynlong nyngkong ïa ka Monolith Festival ka la shongshit namar na kylleng ka jylla ki la wan lut ban sakhi ïa ka jingshad tynrai, ki riam tynrai bad ka bam tynrai namar kane ka jaka ka don marjan bad ka ’law kyntang ka Hima Mawphlang, hynrei naduh ba la pynsangeh noh ïa kane ka tamasa ka la sdang kynjah.
Katba ki mawbynna kiba la pynïeng ha kane ka jaka ki dang ïeng skhem bad pynitynnad ïa ki nongjngohkai pyrthei.
Watla kitei ki ïing trep ki dang don, hynrei ym shah shuh ban rung shapoh namar ki la sdang synjor hynrei la ïohi ba dang don bun ki nongjngohkai pyrthei ki dang wan kai pyngngad ha kane ka jaka.
Kum ban shu pynkynmaw ka KHADC ka la pyrshang ban pynlong biang ïa kane ka tamasa, hynrei ka la sangeh noh naduh ba la wan ka khlam Covid-19 bad haduh mynta kam shym la don shuh ka jingïakren.
