Washington, Iaïong:
Ka United States ha ka Lah Sngi U Blei ka la dawa na ka Russia ba ka dei ban pyllait noh ia u nongthoh khubor jong ka Wall Street Journal, u Evan Gershkovich bad ban ym pynshitom ia u namar um don bynta eiei ha ka jingleit syntiat kumba la kynnoh da ka Russia.
Ia u Gershkovich la kem da ki bor pyniaid ka Russia ha ka 29 tarik u Lber, ha kaba ka Russia ka la kynnoh ba utei u nongthoh khubor u dei u nongleit syntiat ba la phah khnang da ka United States sha Russia bad kane ka long ka sien ba nyngkong eh ba ka Russia kan bat, bad kan kynnoh ia ki nong US ba ki dei ki nongsyntiat jong ka US watla ka US ka khlem don jingthmu eiei sha lyndet kumba la kynnoh da ka Russia.
Kumta, u Secretary of State, u Antony Blinken ha katei ka sngi u la ong ba ka jingkem bad jingpharep jong ka Russia ia utei u nongthoh khubor ka long kaba bakla bad kumta ka Russia ka dei ban pyllait mardor ia utei u briew u bym shym don jing jingtip eiei halor katei ka jingkynnoh jong ka Russia bad u bym shym la iadon bynta eiei bad ka Sorkar US hynrei ka jingleit jong u sha Russia ka long ka jingleit sngewbha jong u hi.
Naba ka US ka la ong ba ka kam thoh khubor bad ban leit wad khubor kam dei ka kam sniew ne kaba wanrah jingma ïano ïano, kumta ruh ka Russia kam dei ban shim da kumwei pat haba iadei bad ka jingleit jong u sha Russia ha la ka jong ka kam bad da la ka mon sngewbha jong u hi shimet.
Kumjuh ruh u President ha kine ki khyndiat sngi ba la leit, u la dawa ia ka Russia ba ka dei ban pyllait noh ia utei u nongthoh khubor u bym shym la iadon bynta eiei bad ka sorkar US ne bad ki tnat iada ri jong ka US. Namarkata ruh u la pynshai ba utei u nongthoh khubor um shym la don bynta eiei ha katei ka kam syntiat ba la pharep da ka Russia.
Hynrei la ong ba ka US kan hap ban da pynbiang ia ki jingpynshisha bad ki jingdonkam baroh naka bynta ban ioh pyllait noh ia utei u nongthoh khubor.
