Nongpoh, Ïaïong 11:
Ha kawei ka jingjia kaba la paw tyngkreiñ ba ka jingshalan beaiñ ïa u dewïong ka dang ïaid beit kat haduh mynta ha ka jylla naba kawei ka trok kaba don ïa u number ML07-B-9154 ha ka step ka Sngi Ba-ar ka la leit ban noh beit-beit sha ka riat bah ha ki bynta jong ka shnong Umling.
Kumba la ïoh lum jingtip, la ïathuh ba katei ka trok kaba kit beaiñ ïa u dewïong ka dei kaba wan na ki thaiñ West Khasi Hills bad pyndonkam da ka surok khlaw na ki bynta jong ka Mairang-Umrit-Umling ban lait na ka jingshah talasi ha ki pulit ha surok bah.
Ha kane ka jingjia, u nongñiah jong katei ka trok u la mynsaw bad na ka liang ki nongrep bad ki paidbah nongshong shnong kiba la sakhi ïa katei ka jingjia, ki la leit mar-mar ban ïarap ban pynkit noh ïa ki sha jaka ai jingsumar.
Halor kane ka jingjia, na ka liang u Superintendent of Police ka Ri Bhoi District, u Giri Prasad u la ïathuh ba ïa katei ka trok yn tan noh na katei ka jaka ha katei hi ka sngi. Nalorkata, yn pynngat ruh ïa katei ka trok katkum ki kyndon aiñ halor ka jingshalan beaiñ ïa u dewïong.
