Marseille, France:
La ong ba ha ka Lah Sngi U Blei ki tnat iarap ki la iakhun shitom ban wad bad ban ioh sei ia kino kino kiba la ngat bad shah tap ha katei ka ïingmala ba la julor na ka jingbthei ha ka Sngi U Blei.
Kumta la ong ba hadien 24 kynta jong katei ka jingbthei ha kawei na ki ïingmala kiba don ha Marseille, ki tnat iarap bad ki pulit ha katei ka sngi ki la ioh ban sei noh sa ia 4 ngut kiba la ngat bad khlad ha katei ka jingtwa katei ka ïingmala.
Watlakatta, u heh jong ka Mediterranean Port City, u la ong ba la khmih lynti ba ki kynhun iarap kin dang ioh sei bad pyllait im ia kiwei pat kiba dang don bad kiba dang sahkut hapoh jong katei ka jaka.
Ha ka Sngi U Blei, hashwa ban ioh sei ia ki katto katne ngut na katei ka ïingmala ba la twa, ki bor pyniaid ki la iathuh ba 8 ngut ki briew kiba shong bad sah ha katei ka ïingmala, kim shym la shim shuh ia ka phone haba la phone ia ki. Hadien kata ki kynhun iarap ki la ioh ban sei noh ia 5 ngut kiba la mynsaw na ka jingbthei bad jingkhyllem jong katei ka ïingmala ha katei ka jingjia.
Watla katta, ym pat lah ban tip shai ia ka daw jong katei ka jingbthei kaba jur hynrei la ioh jingtip ba ki briew ha katei ka jaka ki ïohsngew bha ia ka jingsma ka lyer ‘gas’ lane lah ban ong ba ka jinglait jong katei ka lyer bih na ki tyndong lyer.
Ka Saveria Mosnier, kaba sah harud ka surok La Plaine hajan jong katei ka jaka, ka iathuh ba ha katei ka miet ka la ïohsngew ia ka jingbthei bad ka jingsawa kaba jam bha katba ka dang iohthiah ha katei ka por.
Kumta ka la kyndit katba lah bad ka pyrkhat ruh ioh lehse ka dei tang ka jingphohsniew jongka.
Hynrei ha kata ka por ka ïohsngew ia ka jingsma jong ka lyer bih kum ka jingsma jong ka lyer ba ju lait na ki tyndong lyer bad wat haduh ka step Lah Sngi U Blei ruh ki paidbah nongshong shnong jong katei ka jaka ki dang lah ban ïohsngew ia katei ka lyer kaba lait.
