Nongstoiñ, Ïaïong 11:
Ka lympung ïalehkai phutbol ba la tip kum ka West Khasi Hills Block Level Under-12 Chief Minister Open Football Tournament 2023 ka la jam shaphrang haduh ka Sngi Ba-ar jong ka taïew.
Ïa kane ka lympung ïalehkai la pynlong ruh da ka shlem treikam jong ka District Sports Officer (DSO) West Khasi Hills ha madan NDSA Nongpyndeng ha kaba ki don 16 tylli ki kynhun ha ka liang ki khynnah shynrang bad saw tylli ha ka liang ki kynthei.
Ïa kane ka lympung la plie pyrda ha ka Lah Sngi U Blei (10 tarik) ha katei ka madan. Haba phai pat sha ka jingïalehkai kaba long ha ka Sngi Ba-ar ha ka liang ki khynnah shynrang, ka Pyndengrei SS&CC ka la khur ïa ka jingjop hadien ba lah pynliem noh da 4-1 kol ïa ka Borsing Memo SS.
Ka Mawkadiang SC ka la pynliem noh da 5-1 kol ïa ka Mawlarshong, ka GRC ‘A’ ka la pynjem khnap haduh 12-0 kol ïa ka Don Bosco Hr.SS, ka Jaidoh YSA ka la pynliem noh da 4-0 kol ïa ka GRC’B’.
Nangta ka Upper Marskuiñ ka la pynliem noh da 1-0 kol ïa ka St. Xavier’s SS, ka Marskuiñ SCSC ka la pynliem noh da 3-1 kol ïa ka Mawpun FT, ka Sib Singh Memorial Govt. Hr.SS ka la pynliem noh da 10-0 kol ïa ka Sacred Heart Hr.SS, katba ka Nonglwai SC ka la pynliem noh da 3-0 kol ïa ka Nongstoiñ SS&CC.
Haba phai pat sha ka liang ki khynnah kynthei ka GRC ka la khur ïa ka jingjop hadien ba lah pynliem noh da 7-0 kol ïa ka St. Xavier’s SS, bad ka Nongstoiñ SS&CC ka la pynliem noh da 7-0 kol ïa ka Sacred Heart.
