Shillong, Ïaïong 11:
U President ka Hynñiewtrep National Youth Front (HNYF), Bah Sadon K. Blah ha ka Sngi Ba-ar u la ong ba ka jingkhmih bniah ïa ka bhah thung kam ne ka ‘Reservation Policy’ ka lah ban wanrah pynban ïa ka jingma.
“Ka ïingbishar kam shym la kren ïa kaba shadien ha ka rai jong ka. Ka Sorkar ka dei ban thaw ïa ki mat treikam ki ban ïahap ha kata ka rukom ba kam dei ban treikam na shadien. Ka dei ban treikam beit naduh ka sngi ba ka ïingbishar ka la pynmih ïa ka rai,” la ong u Bah Blah haba kren bad ki lad pathai khubor.
Halor ka jingdawa ban khmih bniah ïa ka ‘Reservation Policy’, utei u nongïalam u la pynsngew ba kiba bun ki rai jong ka ïingbishar ba hakhliehduh ka ri ki ong ba ka bhah kam dei ban long palat ïa ka 50%.
“Lada pyrshang ban wanrah da ka aiñ ka ban ong ban khmih bniah ne pynbha syndon ïa ka ‘Reservation Policy’ baroh kawei, ka lah ban khring ïa ka tnad ‘Judiciary’ la ka long ka ïingbishar ka Jylla ne ka ïingbishar ba hakhlieh duh ka ri bad kane kan dei ka jingduhnong kaba kham jur shuh-shuh,” u la ong.
U la ong ruh, “Kaei kaba ngi lah ban leh kumba ngi ju leh naduh mynshuwa, lait noh ba kata ka ‘Roster System’ kam dei ban treikam na shadien, ka dei ban long ha kata ka rukom.”
Shuh shuh u la ban biang ba lada wanrah da ka aiñ ne pynbha ïa ka ‘Reservation Policy’ baroh kawei, kan khring ïa ka tnad Judiciary bad kaba ma ka long ba ïoh ka thlieh pat da kata kaba ong – ym ban palat ïa ka 50%.
“Kane kan nang buh jingma shuh-shuh,” u la ong.
Kum ban shu kdew hangne, ka Voice of the People Party (VPP) ka la thoh sha u Myntri Rangbah ka Jylla, u Conrad K. Sangma ban khot pynlong da ka Dorbar ba Kyrpang ban ïatai halor ka jingdonkam ban khmih bniah ïa ka ‘Reservation Policy’.
