Shillong, Ïaïong 11:
Ka lympung ïalehkai Inter School Cricket League 2022-23 ba la pynïaid da ka Shillong Cricket Association ka la sdang ha ka Sngi Ba-ar ha madan Polo ha kaba ka Shillong Secondary School bad ka Madrasa ki la khur ïa ka jingjop.
Ha kane ka lympung ki don haduh hynñiew tylli ki skul kiba wan ïashim bynta ha kaba la phai ha ki ar tylli ki group. Ha ka Group-A ki long ka Shillong Secondary, Duncan SS, Gorkha Pathshala HSS bad ka St. Anthony’s, katba ha ka Group-B ki long ka Sunrise Academy SS, Jail Road Boys HSS bad ka Madrasa Hemyatul Islam LPS.
Ha ka jingïakhun kaba nyngkong, ka Shillong Secondary ka la pynliem noh ïa ka St. Anthony’s School da 8 wiket. Ka St. Anthony’s ka la kam trai shwa ban tied nyngkong ha kaba ka la kamai 88 run bad shah pynkhyllem 10 wiket ha ki 15 over. U Trejosh u la tied 18 run na ki 28 bol bad u Ayush u la ïoh 7 run na ki 12 bol. Katba u Shewam u la khur 3 wiket bad 2 wiket da u Sumit na ka bynta ka Shillong Secondary.
Haba wan shimti ïa ka pali ba ar, ka Shillong Secondary ka la kynnoh sha ka thong da kaba ïoh 89 run ha ki 11 over. U Badal u la tied 24 run na ki 30 bol bad u Shewam u la tied 18 run na ki 25 bol. Katba u Avinash bad u Trejosh ki la khur mar 1 wiket na ka bynta ka St Anthony’s. Ïa ka nam ‘Man of the Match’ la khur da u Badal.
Haba phai sha kawei pat ka jingïakhun ba ar, ka Madrasa ka la pynliem noh ïa ka Jail Road Boys da 10 wiket. Ka Jail Road ka la shimti shwa ban tied nyngkong bad ka la kamai 96 run bad shah pynkhyllem 6 wiket ha ki 15 over. U Rahul Paul u la tied 35 run na ki 24 bol bad u Samir u la tied 28 run na ki 26 bol. Katba u Amir u la khur 3 wiket bad ïa ki 2 wiket la khur da u Imran.
Haba wan shimti ïa ka pali ba ar, ka Madrasa ka la kynjoh sha ka thong da kaba ïoh 98 run ha ki 8.3 over. U Md Wahid u la tied 62 run na ki 30 bol bad u Arman u la ïoh 20 run na ki 17 bol. Ïa ka nam ‘Man of the Match’ la khur da u Md Wahid.
