Shillong, Ïaïong 11:
U Symbud Myntri Rangbah ka Jylla Bah Prestone Tynsong haba kyntu ïa ki paid nongshong shnong ka jylla ban nym pynsaphriang ïa ki khubor bad ‘video’ haba ïadei bad ka jingshah bat bad shah ktah kti jong ar ngut ki nongïalam niam na Meghalaya, u la pynshai ba kam shym la don satia ka jingshah ktah kti, hynrei ka dei tang ka jingsngewthuh bakla.
Haba kren sha ki lad pathai khubor ha ka Sngi Ba-ar, u Bah Prestone u la kyntu ïa ki paidbah ba kin ym pynsaphriang ïa ki jingtip bym dei namar ka lah ban wanrah ïa ka jingsngew pher jaidbynriew hapoh ka Jylla.
Lah ban kdew ba ha ka por mynsngi jong ka Sngi Ba-ar ka khubor ka la saphriang halor ka jingshah ktah kti jong ar ngut ki nongïalam niam ka Jylla, kita u Rev. Rueben Laloo bad Tbn. T Nongkhlaw ha ki runar ha Bihar.
U Bah Prestone haba pynshai halor ka jingjia u la ong ba ka don tang ka jingïapynphai ktien markylliang bad ki nongïalam niam kim shym la shah ktah kti satia.
Haba pynsngew ïa ka jingsngewkhia ba ka jingpynsaphriang ïa ka khubor thok ka lah ban lam sha ka jingïakynad sngewpher jaidbynriew ha Jylla. Kumta u la kyntu ïa ki paidbah ban kiar na ka jingpynsaphriang ïa ka ‘video’ ha ki ‘social media’.
Shuh shuh u la pyntip ba ka Sorkar ka la shimkhia ïa kane ka kam bad ka la shim ruh ïa ka sienjam ba dei ban shim bad pyntip ruh ba u Chief Secretary ka Jylla lem bad u DGP ruh ki la dep ban ïakren bad ki heh ophisar jong ka Bihar bad la kyrpad ruh ban ai ka jingpahara ïa kitei nongialam niam.
Ha kawei pat ka liang, u Myntri Rangbah ka jylla u Conrad K Sangma halor kane ka jingjia, lyngba ka rynsan ‘twitter’ ka jong u ba u la pyllait, u la pynrem jur ïa kane ka jingjia ha Bihar ha kaba ar ngut ki nongïalam ka Balang Presbyterian ki la shah ktah kti ha ki runar.
Nangta, lyngba kane kajuh rynsan lad pathai (twitter) u la bthah ruh ïa ki pulit ka Meghalaya ba kin ïakren bad ki pulit ka Bihar kiba dang ïarap ïa ki briew ka jylla, kiba dang shim ruh ka jingkren jong ki na ka bynta ban ujor ejahar pyrshah ïa ki runar.
